ဆော့ဖ်ဝဲလ်ပြဿနာကြောင့် Airbus လေယာဉ် ထောင်ပေါင်းများစွာ မြေပြင်တွင် ရပ်နားခဲ့ရ

Image via www.aerotime.aero

ပြီးခဲ့တဲ့လတုန်းက လေယာဉ်တစ်စီး ရုတ်တရက် အမြင့်ပေ ထိုးကျသွားတဲ့ဖြစ်ရပ်နဲ့ ဆက်စပ်နေနိုင်တဲ့ ဆော့ဖ်ဝဲလ် ပြဿနာတစ်ခုကြောင့် လေကြောင်းလိုင်းတွေဟာ Airbus လေယာဉ် ထောင်ပေါင်းများစွာကို မပျံသန်းခိုင်းဘဲ မြေပြင်မှာပဲ ရပ်နားထားဖို့ ဖိအားပေးခံနေရပါတယ်။

ကမ္ဘာတစ်ဝန်းက လေကြောင်းလိုင်းတွေဟာ ဒီဆော့ဖ်ဝဲလ်ပြဿနာကို တွေ့ရှိပြီးနောက်မှာ Airbus လေယာဉ် အများအပြားကို ရပ်နားထားလိုက်ရပါတယ်။ ဒီပြဿနာဟာ ပြီးခဲ့တဲ့လက လူ ၁၅ ဦး ဒဏ်ရာရရှိခဲ့တဲ့ လေယာဉ် အမြင့်ပေ ရုတ်တရက် ထိုးကျမှုဖြစ်စဉ်မှာ တစ်စိတ်တစ်ပိုင်း ပါဝင်ပတ်သက်နေတယ်လို့ ယူဆရပါတယ်။

A320 လေယာဉ်အစီးရေ ၆၀၀၀ လောက် ထိခိုက်နိုင်တယ်လို့ ခန့်မှန်းထားပြီး စနေ၊ တနင်္ဂနွေ ရက်တွေမှာ ခရီးစဉ် နှောင့်နှေးတာတွေ၊ ဖျက်သိမ်းတာတွေ ရှိနေပါတယ်။ JetBlue လေယာဉ်ဖြစ်စဉ်ကို စစ်ဆေးကြည့်တဲ့အခါ solar radiation ကြောင့် A320 လေယာဉ်တွေရဲ့ ပျံသန်းထိန်းချုပ်ရေးအတွက် အရေးကြီးတဲ့ ဒေတာတွေ ပျက်စီးသွားနိုင်တယ်လို့ Airbus က သောကြာနေ့မှာ ပြောပါတယ်။ ဒီကိစ္စဟာ လေယာဉ်ပေါ်ကကွန်ပျူတာတွေကို ထုတ်ပေးလိုက်တဲ့ ဆော့ဖ်ဝဲလ် အဆင့်မြှင့်တင်ခြင်းတစ်ခုကြောင့် ဖြစ်ရတာပါလို့ EU အေဂျင်စီက ဆိုပါတယ်။

ဥရောပသမဂ္ဂ လေကြောင်းဘေးကင်းရေး အေဂျင်စီ (EASA) နဲ့ အမေရိကန် ပြည်ထောင်စု ဖက်ဒရယ်လေကြောင်းစီမံခန့်ခွဲရေးအဖွဲ့ (FAA) တို့ကတော့ လေကြောင်းလိုင်းတွေကို ဒီပြဿနာဖြေရှင်းဖို့ ဆော့ဖ်ဝဲလ် အဆင့်မြှင့်တင်ခြင်းကို အမြန် လုပ်ကြဖို့ တိုက်တွန်းထားပါတယ်။ ဒီလိုလုပ်ဆောင်ရတဲ့အတွက် လေကြောင်းခရီးစဉ်တွေမှာ "ကာလတို အနှောင့်အယှက်ဖြစ်မှု" တချို့ ရှိနိုင်တယ်လို့ EASA က ပြောပါတယ်။

ဗြိတိန်လေကြောင်းအာဏာပိုင်ကလည်း ခရီးစဉ်တချို့ နှောင့်နှေးတာနဲ့ ဖျက်သိမ်းတာတွေ ရှိလာနိုင်တယ်လို့ ပြောထားပါတယ်။ အမေရိကန်မှာဆိုရင်လည်း မှတ်ပုံတင်ထားတဲ့ လေယာဉ်အစီးရေ ၅၀၀ လောက် ထိခိုက်မှုရှိမှာဖြစ်ပြီး၊ အခုအချိန်က ကျေးဇူးတော်နေ့ အားလပ်ရက်အပြီး ခရီးသွားတွေ အိမ်ပြန်ကြမယ့် အလုပ်အရှုပ်ဆုံးအချိန်နဲ့ တိုက်ဆိုင်နေပါတယ်။

American Airlines မှာ A320 အမျိုးအစား လေယာဉ်ပေါင်း ၄၈၀ လောက်ရှိတဲ့အထဲက ၂၀၉ စီးက ဒီပြဿနာနဲ့ ကြုံနေရပါတယ်။ ဒီကိစ္စကို ပြင်ဆင်ဖို့ လေယာဉ်တစ်စီးကို ၂ နာရီလောက် ကြာမှာဖြစ်ပြီး အများစုကို သောကြာနေ့မှာ အပ်ဒိတ်လုပ်ပြီးစီးမယ်လို့ ခန့်မှန်းထားသလို ကျန်တဲ့ အနည်းစုကိုတော့ စနေနေ့မှာ ဆက်လုပ်မှာပါ။ ကြန့်ကြာမှုတချို့ ရှိနိုင်ပေမယ့် ခရီးစဉ်ဖျက်သိမ်းရတာမျိုး နည်းနိုင်သမျှနည်းအောင် ကြိုးစားသွားမယ်လို့ လေကြောင်းလိုင်းက ပြောပြီး ဘေးကင်းလုံခြုံရေးက သူတို့ရဲ့ ထိပ်တန်းဦးစားပေးဖြစ်ကြောင်း အလေးထား ပြောကြားခဲ့ပါတယ်။

EasyJet လေကြောင်းလိုင်းကလည်း ခရီးသည်တွေကို ကြန့်ကြာမှုတွေ ဖြစ်နိုင်ကြောင်း သတိပေးထားပါတယ်။ သူတို့ရဲ့ ထုတ်ပြန်ချက်မှာ "ကျွန်တော်တို့ရဲ့ A320 လေယာဉ်တွေကို ဆော့ဖ်ဝဲလ် ပြောင်းလဲမှုတွေ လုပ်ဆောင်နေပါတယ်၊ ပျံသန်းမှု အချိန်ဇယား ပြောင်းလဲတာမျိုးရှိရင် အသိပေးသွားပါမယ်" လို့ ပြောထားပါတယ်။

Air India ကတော့ သူတို့အင်ဂျင်နီယာတွေအနေနဲ့ အဆင့်မြှင့်တင်ခြင်းတွေဆောင်ရွက်နေပြီး လိုအပ်ချက်ရှိတဲ့ လေယာဉ်တွေထဲက ၄၀ ရာခိုင်နှုန်းကျော်ကို ပြင်ဆင်ပြီးသွားပြီလို့ X (Twitter) မှာ ပြောထားပါတယ်။ လောလောဆယ်အထိတော့ ခရီးစဉ်ဖျက်သိမ်းရတာမျိုး မရှိသေးပါဘူး။

အခုဆော့ဖ်ဝဲလ်ပိုင်းမှာ ပြဿနာတက်နေတဲ့ Elevator and Aileron Computer (ELAC) လို့ခေါ်တဲ့ ပျံသန်းကွန်ပျူတာကိုတော့ လေကြောင်းနဲ့ ကာကွယ်ရေးဆိုင်ရာ ကုမ္ပဏီတစ်ခုဖြစ်တဲ့ Thales က ထုတ်လုပ်တာ ဖြစ်ပါတယ်။

အောက်တိုဘာ ၃၀ ရက်နေ့က မက္ကဆီကိုနိုင်ငံ၊ ကန်ကွန်းကနေ နယူးဂျာစီ၊ နူးဝပ်ခ်ကို ပျံသန်းတဲ့ JetBlue လေယာဉ်ခရီးစဉ်မှာ အနည်းဆုံး ခရီးသည် ၁၅ ဦး ဒဏ်ရာရရှိခဲ့တဲ့ ဖြစ်ရပ်ဖြစ်ပွားခဲ့ပြီးနောက် လေယာဉ်ကို ဖလော်ရီဒါပြည်နယ်၊ တမ်ပါမြို့ဆီ လမ်းကြောင်းပြောင်း ဆင်းသက်ခဲ့ရပါတယ်။

Airbus ဟာ Boeing ကုမ္ပဏီလို ကမ္ဘာ့အကြီးဆုံး လေယာဉ်ထုတ်လုပ်တဲ့ ကုမ္ပဏီကြီးတစ်ခု ဖြစ်ပါတယ်။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။ 

Source: euronews