ကာလရှည်ကြာစောင့်ဆိုင်းခဲ့ရသည့် Prince of Persia Remake လာမည့်နှစ်ဆန်းတွင် ထွက်ရှိလာနိုင်

Image via Kitguru 

Ubisoft ရဲ့ Prince of Persia: The Sands of Time Remake ဟာ ကံမကောင်းအကြောင်းမလှမှုတွေနဲ့ ကြုံတွေ့ခဲ့ရတယ်လို့ ဆိုနိုင်ပါတယ်။ ၂၀၂၀ ခုနှစ် အကုန်ပိုင်းလောက်မှာ ဒီဂိမ်းကို ၂၀၂၁ ခုနှစ်  ဇန်နဝါရီလမှာ ဖြန့်ချီမယ်ဆိုပြီး စကြေညာခဲ့ပေမယ့်၊ အဲ့ဒီတုန်းက ထွက်လာတဲ့ နမူနာ Trailer အပေါ် ပရိသတ်တွေရဲ့ တုံ့ပြန်မှုက လုံးဝကို မကောင်းခဲ့ပါဘူး။ ဒါကြောင့် ထုတ်ဝေသူဘက်က ဂိမ်းထွက်မယ့်ရက်ကို ရွှေ့ဆိုင်းခဲ့ရပါတယ်။ 

အဲ့ဒီနောက်ပိုင်း ဂိမ်းကို ရွှေ့ဆိုင်းလိုက်၊ ထပ်ရွှေ့လိုက်၊ Developer အဖွဲ့ကို ပြောင်းလိုက်၊ အစကနေ ပြန်လုပ်လိုက်နဲ့ သံသရာလည်နေပြီးမှ ၂၀၂၄ခုနှစ် မှာ ပြန်လည်မိတ်ဆက်နိုင်ခဲ့တာပါ။ ဒါပေမဲ့ အခုတော့ ဒီခရီးရှည်ကြီး အဆုံးသတ်တော့မယ့်ပုံပါပဲ၊ ဘာလို့လဲဆိုတော့ ဒီဂိမ်းကို လာမယ့် ဇန်နဝါရီလလောက်မှာ ဖြန့်ချိတော့မယ်လို့ သတင်းထွက်လာတာကြောင့်ပါ။ 

နာမည်ကျော် Insider-Gaming ရဲ့ ဖော်ပြချက်အရ Ubisoft ဟာ Prince of Persia: The Sands of Time Remake ကို ၂၀၂၆ ခုနှစ်၊ ဇန်နဝါရီလ အလယ်လောက်မှာ ထွက်ရှိဖို့ လျာထားတယ်လို့ သိရပါတယ်။

စိတ်ဝင်စားစရာကောင်းတာက ပထမဆုံးပြခဲ့ပြီး အခုတော့ အရာမဝင်တော့တဲ့ Trailer အပြီးမှာ ဒီဂိမ်းနဲ့ပတ်သက်ပြီး ဘာမှ မမြင်ရသေးပါဘူး။ ဂိမ်းကို ပြန်လည်မိတ်ဆက်တုန်းကလည်း Cinematic လိုဂိုတစ်ခုနဲ့ ၂၀၂၆ ခုနှစ်မှာ ထွက်မယ်ဆိုတဲ့ မရေရာတဲ့ အချိန်ကာလလောက်ကိုပဲ ပြသခဲ့တာပါ။

ဒါပေမဲ့ ပြီးခဲ့တဲ့ ဇွန်လတုန်းကတော့ Ubisoft က ဒီပရောဂျက်နဲ့ ပတ်သက်ပြီး မှတ်ချက်ပေးခဲ့ပါသေးတယ်။ သူတို့အနေနဲ့ "ဂိမ်းကို အသေးစိတ် ဖန်တီးနေဆဲဖြစ်ပြီး သဲမှုန်တွေကို အသက်ဝင်လှုပ်ရှားဖို့ သေချာလုပ်ဆောင်နေပါတယ်။ ဒီဂိမ်းကို တကယ်စိတ်နှစ်ထားတဲ့ အဖွဲ့က ဖန်တီးနေပြီး အဆင့်တိုင်းမှာ သူတို့ရဲ့ နှလုံးသားတွေကို နှစ်မြှုပ်ထားပါတယ်၊ စောင့်ဆိုင်းပေးတဲ့အတွက် ကျေးဇူးပါ" ဆိုပြီး ပြောကြားခဲ့ပါတယ်။

ဒါ့အပြင် Ubisoft က မေလတုန်းက ပြုလုပ်ခဲ့တဲ့ ဘဏ္ဍာရေးရှင်းတမ်း အစီရင်ခံစာမှာ The Sands of Time Remake ဟာ ၂၀၂၅-၂၆ ဘဏ္ဍာရေးနှစ် (၂၀၂၅ ဧပြီမှ ၂၀၂၆ မတ်လအတွင်း) ရောက်ရှိလာမယ်လို့ ထုတ်ဖော်ပြောကြားခဲ့ဖူးတာကြောင့် အခုထွက်ပေါ်လာတဲ့ ၂၀၂၆ ဇန်နဝါရီလမှာ ထွက်မယ်ဆိုတဲ့ သတင်းဟာ ပိုပြီး ဖြစ်နိုင်ခြေများနေပါတယ်။

ပထမအကြိမ် စမ်းသပ်ပြသတုန်းက ပရိသတ်တွေရဲ့ တုံ့ပြန်မှု အရမ်းဆိုးရွားခဲ့တာကြောင့် အခု အသစ်ပြန်လုပ်ထားတဲ့ ပရောဂျက်က ဘယ်လိုပုံစံ ထွက်လာမလဲဆိုတာ စိတ်ဝင်စားဖို့ ကောင်းနေပါတယ်။ မကြာခင်ကျင်းပမယ့် 2025 Game Awards ပွဲမှာ ဒီဂိမ်းရဲ့ အရသာအစစ်အမှန်ကို ပထမဆုံးအကြိမ် မြင်တွေ့ခွင့်ရလိမ့်မယ်လို့ ယူဆရပါတယ်။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။ 

Source: Kitguru