AI ကြောင့် အလုပ်လက်မဲ့ မဖြစ်စေနိုင်သည့် အလုပ်အကိုင်များကို Microsoft ထုတ်ပြန်

Image: Microsoft

Microsoft Research (MSR) ရဲ့ လေ့လာမှုအသစ်တစ်ခုက သုံးစွဲသူအမျိုးမျိုးနဲ့ Microsoft Bing Copilot ကြားက စကားပြောဆိုမှု ၂ သိန်းကို ခွဲခြမ်းစိတ်ဖြာခဲ့ပြီး စိတ်ဝင်စားစရာကောင်းတဲ့ ရလဒ်တွေ ထွက်ပေါ်လာခဲ့ပါတယ်။ ဒီလေ့လာမှုအရ အချို့အလုပ်အကိုင်တွေဟာ Generative AI ရဲ့ သက်ရောက်မှုကို အများကြီး ခံရမှာ မဟုတ်ဘူးလို့ ဆိုပါတယ်။

သုတေသီတွေက သုံးစွဲသူတစ်ဦးချင်းစီရဲ့ အလုပ်အကိုင်အတွက် "AI သက်ရောက်မှု အမှတ်" သတ်မှတ်တဲ့ နည်းလမ်းတစ်ခုကို တီထွင်ခဲ့ပါတယ်။ ရလဒ်တွေကတော့ အံ့သြစရာ မဟုတ်ပါဘူး။ သင်ခန့်မှန်းနိုင်တဲ့အတိုင်း ရုပ်ပိုင်းဆိုင်ရာ လုပ်ငန်းတာဝန်တွေပါဝင်တဲ့ အလုပ်တွေဟာ AI သက်ရောက်မှု အမှတ်အနည်းဆုံး ရရှိခဲ့ပြီး၊ သတင်းအချက်အလက်ရှာဖွေတာလို ရုပ်ပိုင်းဆိုင်ရာမဟုတ်တဲ့ အလုပ်တွေကတော့ အမှတ်အများဆုံး ရခဲ့ပါတယ်။

အနှိပ်သည်တွေ၊ ထွန်စက်မောင်းသမားတွေ၊ ရေဆိုးသန့်စင်ရေးစက်ရုံ အော်ပရေတာတွေနဲ့ အိမ်အကူတွေလို အလုပ်အကိုင်တွေဟာ Generative AI ရဲ့ သက်ရောက်မှုကို အနည်းဆုံး ခံရမယ့် အလုပ်တွေထဲမှာ ပါဝင်ပါတယ်။ အောက်ဖော်ပြပါ ဇယားက AI သက်ရောက်မှု အမှတ်အနည်းဆုံးရရှိတဲ့ အလုပ်အကိုင် ၄၀ ကို ဖော်ပြထားပါတယ်။

Image via Hot Hardware

Microsoft က ဒီလေ့လာမှုအတွက် ခွဲခြမ်းစိတ်ဖြာထားတဲ့ စကားပြောဆိုမှုတွေနောက်ကွယ်က သုံးစွဲသူတွေကို အမည်မဖော်ပြထားဘူးလို့ ဆိုပါတယ်။ အလုပ်အကိုင်တစ်ခုချင်းစီအတွက် သတ်မှတ်ထားတဲ့ AI သက်ရောက်မှု အမှတ်တွေဟာ AI Model ရဲ့ အောင်မြင်မှုနှုန်း၊ သုံးစွဲသူရဲ့ ရည်ရွယ်ချက်နဲ့ လုပ်ငန်းတာဝန်အောင်မြင်မှုနှုန်းတို့လို အချက်အလက်များစွာကို ပေါင်းစပ်ပြီး သတ်မှတ်ထားတာ ဖြစ်ပါတယ်။

Microsoft က သတိပြုစရာတစ်ခုကိုလည်း ပြောထားပါသေးတယ်။ "AI လုပ်ဆောင်တဲ့ အရာတွေနဲ့ ထပ်နေတဲ့ အလုပ်အကိုင်တွေဟာ အလိုအလျောက်ဖြစ်သွားပြီး အလုပ် သို့မဟုတ် လုပ်ခ ဆုံးရှုံးမယ်လို့ ကောက်ချက်ချဖို့ လွယ်ပါတယ်။ AI ကူညီပေးတဲ့ အလုပ်အကိုင်တွေကတော့ ပိုမိုကောင်းမွန်လာပြီး လုပ်ခတိုးလာမယ်လို့လည်း ထင်ရပါတယ်။ ဒါပေမဲ့ ဒါဟာ မှားယွင်းတဲ့ ယူဆချက် ဖြစ်နိုင်ပါတယ်။ ဘာလို့လဲဆိုတော့ ကျွန်တော်တို့ရဲ့ ဒေတာတွေမှာ နည်းပညာအသစ်တွေကြောင့် အနာဂတ်မှာစီးပွားရေးဆိုင်ရာသက်ရောက်မှုတွေကို ထည့်မတွက်ထားပါဘူး။ ဒီသက်ရောက်မှုတွေကို ခန့်မှန်းဖို့ အလွန်ခက်ခဲပြီး တစ်ခါတစ်ရံမှာ မျှော်လင့်ထားတာနဲ့ ဆန့်ကျင်ဘက် ဖြစ်နေတတ်ပါတယ်" လို့ ဆိုပါတယ်။

Source: Hot Hardware