Windows ဂိမ်းများ၏ ၉၀ ရာခိုင်နှုန်းကို Snapdragon X2 Laptop များတွင် ကစားနိုင်ပြီဟု Qualcomm ပြောကြား

Image: Qualcomm

Qualcomm ရဲ့ Snapdragon X2 Elite နဲ့ X2 Elite Extreme တွေက Windows လက်ပ်တော့တွေအတွက် စွမ်းဆောင်ရည်နဲ့ စွမ်းအင်ချွေတာမှုအပိုင်းမှာ စံနှုန်းသစ်တစ်ခု သတ်မှတ်ပေးနိုင်မယ်လို့ ကတိပြုထားပါတယ်။ Windows Central ရဲ့ အယ်ဒီတာချုပ် Daniel Rubino ဆိုရင် ဒီချစ်ပ်တွေဟာ ဆယ်စုနှစ်တစ်ခုအတွင်းမှာ High-end Windows PC တွေအတွက် အထူးခြားဆုံး ခုန်ပျံကျော်လွှားမှုတစ်ခု ဖြစ်လာနိုင်တယ်လို့တောင် သုံးသပ်ထားပါတယ်။ ဒီချစ်ပ်တွေက PC နဲ့ ဂိမ်းကစားသူတွေအတွက်ရော၊ မိုဘိုင်း ကွန်ပျူတာလောကကိုပါ ပုံစံသစ် ပြောင်းလဲပစ်နိုင်ပါတယ်။

သတင်းမီဒီယာတွေက လက်တွေ့ စမ်းသပ်ထားတဲ့ Benchmark ရလဒ်တွေကလည်း အလားအလာ အရမ်းကောင်းနေပါတယ်။ Snapdragon X2 Elite Extreme ဆိုရင် သူ့ရဲ့ Single-core၊ Multi-core နဲ့ GPU စွမ်းဆောင်ရည် ကိန်းဂဏန်းတွေကြောင့် ပိုပြီး စိတ်ဝင်စားဖို့ ကောင်းနေတာပါ။ Rubino ကတော့ ဒီအကြောင်းကို အသေးစိတ် ရှင်းပြထားပြီး ဖတ်ကြည့်သင့်ပါတယ်။ အဓိက ပြောချင်တာကတော့ ဒီချစ်ပ်တွေဟာ တကယ့်ကို ထူးခြားကောင်းမွန်လာနိုင်တယ် ဆိုတာပါပဲ။

ဒါပေမဲ့ ကိုယ်ကြိုက်တဲ့ ဂိမ်းတွေ၊ ပရိုဂရမ်တွေ သုံးမရဘူးဆိုရင် Benchmark တွေ၊ လက်တွေ့ စွမ်းဆောင်ရည်တွေ ဘယ်လောက်ကောင်းကောင်း ဘာမှ အဓိပ္ပာယ်မရှိပါဘူး။ Microsoft နဲ့ Qualcomm တို့က Windows on ARM ကို ပိုကောင်းလာအောင် နှစ်နဲ့ချီ ကြိုးစားခဲ့ကြတာပါ။ အက်ပ်ပလီကေးရှင်းတွေအပိုင်းမှာတော့ သူတို့ကြိုးစားမှုရဲ့ ရလဒ်တွေကို သိသာထင်ရှားစွာ မြင်နေရပြီး အခုဆိုရင် ဂိမ်းပိုင်းမှာလည်း အမီလိုက်လာနေပြီလို့ဆိုနိုင်ပါတယ်။

VideoCardz ရဲ့ ဖော်ပြချက်အရ Qualcomm က ဘာပြောလဲဆိုတော့ Snapdragon X processor အသစ်တွေ သုံးထားတဲ့ လက်ပ်တော့တွေ စရောင်းတဲ့အချိန်မှာတင် လူကြိုက်အများဆုံး Windows ဂိမ်းတွေရဲ့ ၉၀ ရာခိုင်နှုန်းကျော်ကို ကစားနိုင်မယ်လို့ ဆိုပါတယ်။ အဲဒီဂိမ်းတွေက ပလက်ဖောင်းပိုင်းဆိုင်ရာ တိုးတက်မှုတွေအပြင် ဒီချစ်ပ်တွေရဲ့ ၂.၃ ဆ ပိုမြင့်မားတဲ့ ဂိမ်းစွမ်းဆောင်ရည်ကိုပါ ရယူသုံးစွဲနိုင်မှာ ဖြစ်ပါတယ်။ ဒါတင်မကသေးပါဘူး၊ Benchmark ရလဒ်တွေမှာဆိုရင်လည်း သူတို့ရဲ့ Adreno X2 iGPU က တူညီတဲ့ settings မှာ Intel ရဲ့ Core Ultra 9 (Lunar Lake) ထက် ၅၀% ပိုမြန်သလို၊ AMD Ryzen AI 9 (Strix Point) ထက်လည်း ၂၉% တောင် ပိုမြန်တယ်လို့ သက်သေပြထားပါတယ်။ ဒီ Chip အသစ်က လူကြိုက်များတဲ့ Windows ဂိမ်းအများစုကို ဆော့လို့ရမယ့်အပြင် အရင်ကထက် Frame Rate ၂.၃ ဆလောက် ပိုတက်လာပါတယ်။

Image: Qualcomm

Flagship ဖြစ်တဲ့ X2 Elite Extreme မှာဆိုရင် ပြိုင်ဘက်တွေရဲ့ iGPU ထက် သာအောင် Processing Block ၄ခု သုံးပေးထားပြီး အထဲမှာ Shader Processor ၈ ခုနဲ့ ALU ပေါင်း ၂၀၄၈ ခုပါဝင်ကာ1.85 GHz အထိ ရရှိနိုင်ပါတယ်။ Memory ပိုင်းမှာလည်း 21 MB On-chip Memory၊ 2 MB Cache နဲ့ 228 GB/s Bandwidth တွေ ပါလာတာဆိုတော့ အတော်လေး အထင်ကြီးစရာကောင်းတယ်လို့ ဆိုနိုင်ပါတယ်။

Image: Qualcomm

Qualcomm ဘက်က ထုတ်ပြန်ချက်အရ ပါဝါစားသုံးမှု တူတူပဲထားရင်တောင် Adreno X1 ထက် 3DMark Time Spy မှာ ရမှတ် ၇၀% ပိုများပြီး Performance per Watt မှာလည်း ၁၂၅% ပိုကောင်းလာတယ်လို့ ဆိုထားပါတယ်။ ဂိမ်းစွမ်းဆောင်ရည်ကို စမ်းသပ်ရာမှာ နာမည်ကြီး Black Myth: Wukong၊ Cyberpunk 2077၊ Red Dead Redemption 2၊ GTA V Enhanced၊ Dota 2 နဲ့ CS2 တို့အပါအဝင် ဂိမ်းပေါင်းများစွာနဲ့ Intel ရော AMD ကိုပါ ယှဉ်ပြထားတာ တွေ့ရပါတယ်။

Qualcomm အနေနဲ့ ဂိမ်းစွမ်းဆောင်ရည်ကို ပိုကောင်းအောင် လုပ်ပေးနိုင်ပြီး Driver တွေကိုလည်း ခေတ်မီနေအောင် ကူညီပေးမယ့် Snapdragon Control Panel ကိုလည်း ထုတ်ပေးထားပါတယ်။ Snapdragon X2 Elite မှာ AVX2 emulation စနစ် ပါဝင်လာတာကလည်း အရေးကြီးပါတယ်။ ဘာလို့လဲဆိုတော့ တချို့ဂိမ်းတွေက Microsoft ရဲ့ Prism Emulator ကနေတဆင့် Run ဖို့အတွက် ဒီစနစ်ကို မရှိမဖြစ် လိုအပ်တာကြောင့်ပါ။

ဒါ့အပြင် Qualcomm ဟာ Windows on Snapdragon ပေါ်မှာ Kernel အဆင့် Anti-cheat စနစ်တွေ ရရှိနိုင်ဖို့အတွက် Microsoft နဲ့ရော၊ ဂိမ်းရေးဆွဲသူတွေနဲ့ပါ ပူးပေါင်းဆောင်ရွက်နေပါတယ်။ နောက်ထပ် ဂိမ်းများစွာမှာ အထောက်အပံ့ပေးနိုင်ဖို့ Anti-cheat ဝန်ဆောင်မှုပေးသူတွေနဲ့လည်း လက်တွဲလုပ်ကိုင်နေပါတယ်။

ပြီးခဲ့တဲ့ စက်တင်ဘာလတုန်းကဆိုရင် Microsoft က သုံးစွဲသူတွေ Windows 11 on Arm ပေါ်မှာ အချိန်ကုန်ဆုံးမှုရဲ့ ၉၀ ရာခိုင်နှုန်းဟာ Native Application တွေအပေါ်မှာပဲ ဖြစ်တယ်လို့ ပြောခဲ့ပါတယ်။ သုံးစွဲသူအများစုအတွက်ကတော့ ဆော့ဖ်ဝဲလ် ကိုက်ညီမှု ပြဿနာက မရှိတော့သလောက်ဖြစ်ပြီး Snapdragon ချစ်ပ်သုံး PC တွေကို Intel ဒါမှမဟုတ် AMD သုံးထားတဲ့ ပြိုင်ဘက်ထုတ်ကုန်တွေနဲ့ ယှဉ်ပြီး ပြသနိုင်တဲ့အဆင့် ရောက်နေပါပြီ။

ဒါက Creator တွေနဲ့ သာမန်အသုံးပြုသူတွေအတွက် ကောင်းပေမယ့် Windows 11 on Arm နဲ့ ဂိမ်းကစားဖို့ကတော့ အရင်က တခြားစီပါပဲ။ အရင်တုန်းကဆို Driver အသစ်ထွက်တာတွေက ပုံမှန်မရှိသလို၊ Integrated Graphics တွေကလည်း အားနည်းပြီး လူကြိုက်အများဆုံး ဂိမ်းတော်တော်များများကလည်း စတင်ထွက်ရှိချိန်မှာ ကစားလို့ မရခဲ့ပါဘူး။

အခုတော့ Snapdragon X2 ချစ်ပ်တွေရဲ့ ဂရပ်ဖစ်ပိုင်း တိုးတက်မှုတွေ၊ Anti-cheat အထောက်အပံ့ ပိုများလာတာတွေ၊ ပိုကောင်းတဲ့ Driver update တွေနဲ့ Emulation စနစ် ပိုကျယ်ပြန့်လာတာတွေကြောင့် Windows on Snapdragon ဟာ ဂိမ်းလောကအတွက် အချိုးအကွေ့တစ်ခုကို ရောက်ရှိနေပါပြီ။ Microsoft၊ Qualcomm နဲ့ ဂိမ်းရေးဆွဲသူတွေရဲ့ ပူးပေါင်းကြိုးပမ်းမှုတွေက ဂိမ်းစက် ပုံစံသစ်တွေ ပေါ်ထွက်လာဖို့ တံခါးဖွင့်ပေးလိုက်တာပါပဲ။

Windows Central ရဲ့ Gaming နဲ့ News အယ်ဒီတာ Rebecca Spear ကတော့ နောက်ထပ် တစ်နှစ်၊ နှစ်နှစ်အတွင်းမှာ Snapdragon ချစ်ပ်သုံး Handheld ဂိမ်းစက်တွေ ထွက်လာရင်တောင် အံ့သြစရာ မရှိဘူးလို့ ပြောပါတယ်။ လ

က်ရှိ အနီးစပ်ဆုံး အနာဂတ်မှာတော့ ဂိမ်းကစားသူတွေအနေနဲ့ လက်ပ်တော့အသစ်တွေကို သုံးစွဲခွင့် ရကြတော့မှာပါ။ Snapdragon X2 Elite နဲ့ X2 Elite Extreme တို့ကို ၂၀၂၆ ခုနှစ် ပထမနှစ်ဝက်လောက်မှာ ထွက်လာမယ်လို့ မျှော်လင့်ရပေမယ့် လာမယ့် ဇန်နဝါရီလ CES ပွဲမှာတင် ဒီထုတ်ကုန်အချို့ကို မြင်တွေ့ရဖွယ်ရှိနေပါတယ်။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။ 

Source: Windows Central and Techpowerup