၂၀၂၅ ခုနှစ်၏ ရောင်းအားအကောင်းဆုံးဂိမ်း ဖြစ်လာသည့် Battlefield 6

ပြီးခဲ့တဲ့လက ပေါက်ကွဲအားပြင်းပြင်းနဲ့ ပွဲထွက်လာပြီးတဲ့နောက်မှာ Electronic Arts (EA) နဲ့ Battlefield Studios တို့ရဲ့ နာမည်ကြီး Multiplayer FPS စီးရီးသစ်ဖြစ်တဲ့ Battlefield 6 ဟာ ဒီနှစ်ရဲ့ လူကြိုက်အများဆုံးဂိမ်းတွေထဲက တစ်ခုဖြစ်လာတယ်ဆိုတာ တော်တော်များများသိကြမှာပါ။ Steam တစ်ခုတည်းမှာတင် ကစားသူ ၇ သိန်းခွဲအထိ ရှိခဲ့သလို ၃ ရက်အတွင်းမှာတင် အခွေ ၇ သန်းတောင် ရောင်းထွက်ခဲ့ပါတယ်။

အဲ့ဒီအောင်မြင်မှုတွေရပြီးနောက်မှာ "ဒီနှစ်ရဲ့ ရောင်းအားအကောင်းဆုံး Shooter ဂိမ်း" လို့ ဂိမ်းဖန်တီးသူတွေက ကြွေးကြော်ခဲ့ပါတယ်။ Call of Duty: Black Ops 7 ထွက်ပြီးပြီးချင်းမှာ ဒီလိုပြောတာက သိပ်ရဲတင်းလွန်းရာကျပေမယ့် လောလောဆယ်တော့ မှန်နေတုန်းပါပဲ။ ဒါပေမဲ့ အချက်အလက်အသစ်တွေအရ ဒီဂိမ်းရဲ့ အောင်မြင်မှုက အဲ့ဒီထက်တောင် ပိုမိုက်နေပါသေးတယ်။

Circana လို့ခေါ်တဲ့ ဈေးကွက်သုတေသနအဖွဲ့က Senior Director ဖြစ်သူ Mat Piscatella ရဲ့ ပြောကြားချက်အရဆိုရင် Battlefield 6 က ဒီနှစ်ရဲ့ ရောင်းအားအကောင်းဆုံး Shooter ဂိမ်းတင်မကဘဲ ၂၀၂၅ ခုနှစ်ရဲ့ ရောင်းအားအကောင်းဆုံးဂိမ်းပါ ဖြစ်လာခဲ့ပါပြီ။ Xbox နဲ့ PC မှာ နံပါတ် ၁ နေရာယူထားပြီး PS5 မှာတော့ NBA 2K26 ရဲ့အနောက် ဒုတိယနေရာမှာ ရပ်တည်နေပါတယ်။

ပိုပြီး ထူးခြားတာကတော့ လွန်ခဲ့တဲ့ ၃ နှစ်အတွင်း ထွက်ခဲ့သမျှ ဂိမ်းတွေထဲမှာ Battlefield 6 က အဖွင့်လ ရောင်းအားအကောင်းဆုံး ဖြစ်နေတာပါပဲ။ သူ့အရင် တစ်လအတွင်း ဒီလောက်ရောင်းအားကောင်းခဲ့တဲ့ ဂိမ်းဆိုလို့ ၂၀၂၂ တုန်းကထွက်ခဲ့တဲ့ Call of Duty: Modern Warfare 2 ပဲ ရှိပါတော့တယ်။ Battlefield 6 ရဲ့ အဖွင့်ရောင်းအားကို အဲ့ဒီဂိမ်းနဲ့ပဲ ခဏခဏ နှိုင်းယှဉ်နေကြတာပါ။

Battlefield သမိုင်းတစ်လျှောက်မှာလည်း ရောင်းအားအကောင်းဆုံးဂိမ်းဖြစ်ကြောင်း Circana ရဲ့ ဒေတာတွေက အတည်ပြုထားပါတယ်။ အရင်တုန်းကတော့ ပွဲဦးထွက်အပတ်မှာ ၅ သန်းကျော် ရောင်းခဲ့ရတဲ့ ၂၀၁၆ ခုနှစ်ထွက် Battlefield 1 က ဒီနေရာကို ယူထားခဲ့တာပါ။ အခုထွက်တဲ့ ဂိမ်းသစ်ကတော့ အဲ့ဒီစံချိန်ကိုပါ ကျော်ဖြတ်သွားပါပြီ။

အောက်တိုဘာလအတွင်း Battlefield 6 က Pokémon Legends: Z-A၊ Ghost of Yotei၊ NBA 2K26၊ The Outer Worlds 2 နဲ့ Little Nightmares 3 တို့လို နာမည်ကြီးဂိမ်းတွေကို ကျော်တက်ပြီး ရောင်းအားကောင်းခဲ့တာပါ။ ဒီရောင်းအားစာရင်းမှာ Xbox၊ PC၊ PlayStation နဲ့ Nintendo Switch 2 (eShop) က Digital ရော Physical အခွေရောင်းအားတွေပါ ပါဝင်ပါတယ်။

၂၀၂၅ ရဲ့ ရောင်းအားအကောင်းဆုံးစာရင်းမှာ သူကျော်ဖြတ်ခဲ့တဲ့ ဂိမ်းတွေထဲမှာ Monster Hunter: Wilds၊ Borderlands 4၊ The Elder Scrolls IV: Oblivion Remastered၊ Elden Ring Nightreign နဲ့ Kingdom Come: Deliverance 2 တို့ ပါဝင်သလို၊ ၂၀၂၄ ကနေ အခုထိ နာမည်ကြီးနေတဲ့ Call of Duty: Black Ops 6 နဲ့ Helldivers 2 တို့လည်း ပါဝင်ပါတယ်။

Circana ရဲ့ နိုဝင်ဘာလ အစီရင်ခံစာထွက်လာရင်တော့ စိတ်ဝင်စားစရာ ကောင်းလာမှာပါ။ ဘာလို့လဲဆိုတော့ သူ့ရဲ့ ပြိုင်ဘက်တွေဖြစ်တဲ့ Black Ops 7 နဲ့ ARC Raiders တို့ရဲ့ အခြေအနေကို တွေ့ရမှာမို့လို့ပါ။ ဒီဂိမ်းနှစ်ခုလုံးက Battlefield ကို မီလာတာ၊ ကျော်တက်သွားတာမျိုး ဖြစ်နိုင်ပေမယ့် ကျွန်တော့်အထင်တော့ Battlefield ကပဲ ရောင်းအားအကောင်းဆုံးနေရာကို ဆက်ပြီး ထိန်းထားနိုင်လောက်ပါတယ်။

Battlefield 6 ဒီလောက်အောင်မြင်ရတဲ့ အဓိကအကြောင်းရင်းကတော့ သေနတ်ပစ်ခတ်ရတဲ့ Gunplay ပိုင်း အရမ်းကောင်းမွန်တာရယ်၊ ၂၀၁၈ ခုနှစ်ထွက် Battlefield V ကတည်းက မှေးမှိန်နေခဲ့တဲ့ ဒီစီးရီးရဲ့ ဂုဏ်သိက္ခာကို ပြန်အဖတ်ဆယ်နိုင်ခဲ့လို့ပါပဲ။ အထူးသဖြင့် ၂၀၂၁ ခုနှစ်တုန်းကထွက်ခဲ့တဲ့ Battlefield 2042 ဆိုရင် Battlefield ဂိမ်းတွေရဲ့ မူရင်းပုံစံနဲ့ အရမ်းကွဲထွက်သွားလို့ ပရိသတ်တွေ စိတ်ပျက်ခဲ့ရပါတယ်။

ဒါနဲ့ဆန့်ကျင်ဘက်အနေနဲ့ Battlefield 6 မှာတော့ စီးရီးရဲ့ မူရင်း Class စနစ်ကို ပြန်အသက်သွင်းထားပြီး လက်နက်မျိုးစုံ၊ နည်းဗျူဟာကျကျ သုံးနိုင်မယ့် Gadgets အသစ်တွေ၊ အရင်ကမရှိဖူးတဲ့ အဆင့်မြင့် ဖျက်ဆီးနိုင်မှုစနစ်တွေ၊ မြေပုံ ၁၁ ခုနဲ့ ဂိမ်း Mode မျိုးစုံကို ထည့်သွင်းပေးထားပါတယ်။ ပြီးတော့ မဆိုးဘူးလို့ ပြောလို့ရတဲ့ Campaign လည်း ပါဝင်လာပါတယ်။

Image: Electronic Arts

အောက်တိုဘာလကုန်ခါနီးမှာ Battlefield Studios က Call of Duty: Warzone ကို ယှဉ်ပြိုင်မယ့် Battlefield REDSEC ဆိုတဲ့ အခမဲ့ Battle Royale ဂိမ်းတစ်ခုကိုလည်း ထုတ်ပေးခဲ့ပါတယ်။ REDSEC က အခမဲ့မို့လို့ အရောင်းစာရင်းထဲ မပါဝင်ပေမယ့်၊ ဂိမ်းကစားသူတွေရဲ့ အာရုံစိုက်မှုကို ရခဲ့ပြီး အဲ့ဒီကနေတဆင့် Full Game ကို ဝယ်ကစားလာအောင် ဆွဲဆောင်နိုင်ခဲ့တာ ဖြစ်ပုံရပါတယ်။

တကယ်လို့ မိတ်ဆွေတို့အနေနဲ့ Battlefield 6 ကို စမ်းကစားချင်တယ်ဆိုရင်တော့ လာမယ့်အပတ် နိုဝင်ဘာ ၂၅ ကနေ ဒီဇင်ဘာ ၂ ရက်နေ့အထိ အခမဲ့ စမ်းသပ်ကစားခွင့် (Free Trial) ပေးအပ်သွားမယ်လို့သိရပါတယ်။ အဲ့ဒီကာလအတွင်းမှာ မြေပုံ ၃ ခုနဲ့ ဂိမ်း Mode ၅ ခုကို ကစားနိုင်မှာဖြစ်ပြီး ဂိမ်းဝယ်မယ်လို့ ဆုံးဖြတ်လိုက်ရင်လည်း ရထားတဲ့ လက်နက်တွေ၊ ဆက်စပ်ပစ္စည်းတွေနဲ့ Level တက်ထားတာတွေကို ဆက်လက် သယ်ဆောင်သွားနိုင်မယ်လို့ ယူဆရပါတယ်။

Image: Electronic Arts

ဒီ Free Trial ကို California Resistance update (Season 1) မိတ်ဆက်တာနဲ့အထိမ်းအမှတ်အနေနဲ့ ပေးတာပါ။ Season 1 မှာ ကယ်လီဖိုးနီးယား တောင်ပိုင်းက ဂေါက်ကွင်းအပန်းဖြေစခန်းပုံစံ Eastwood မြေပုံသစ်၊ လက်နက်သစ် ၂ ခု၊ မြေပုံထဲမှာ ကောက်ယူနိုင်မယ့် Minigun နဲ့ Railgun လို အားပြင်းလက်နက်တွေနဲ့ အလှဆင်စရာ ပစ္စည်းအသစ်တွေ အများကြီး ပါဝင်လာမှာ ဖြစ်ပါတယ်။

Battlefield 6 ကို Xbox Series X|S၊ PC နဲ့ PS5 တို့မှာ မူရင်းဈေး $69.99 နဲ့ ဝယ်ယူနိုင်ပါတယ်။ လက်ရှိအချိန်မှာတော့ Steam နဲ့ EA App မှာ ဒီဇင်ဘာလ ၄ရက်နေ့အထိ $59.49 နဲ့ ရောင်းချနေပြီး ၁၀ ဒေါ်လာလောက် သက်သာမှာဖြစ်လို့ ဂိမ်းဝယ်ဖို့ စိတ်ဝင်စားနေတဲ့သူတွေအတွက် ဒါက အခွင့်အရေးကောင်းတစ်ခုလို့ဆိုချင်ပါတယ်။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။ 

Source: Windows Central