Nvidia ပွဲတွင် ကံစမ်းမဲပေါက်ခဲ့သည့် RTX 5060 ကို ကုမ္ပဏီက သိမ်းယူရန်ကြိုးစားသဖြင့် အလုပ်ထွက်လိုက်သည့် အလုပ်သင်ဝန်ထမ်း

Image: ASUS

RTX 5060 ဂရပ်ဖစ်ကတ်လေး တစ်ကတ်အတွက်နဲ့ ခင်ဗျားတို့ဆိုရင် အလုပ်သင်နေရာကို စွန့်လွှတ်ရဲကြမလား။ Nvidia ပွဲတစ်ခုကို ကုမ္ပဏီကိစ္စနဲ့ ခရီးသွားရင်း ကံစမ်းမဲပေါက်လာတဲ့ အလုပ်သင် ဝန်ထမ်းတစ်ယောက်ကတော့ သူရလာတဲ့ဆုကို ကုမ္ပဏီလက်ထဲ ပြန်အပ်ရမယ်လို့ ဖိအားပေးခံခဲ့ရပါတယ်။ သူကတော့ ဒါကို လုံးဝလက်မခံဘဲ သူ့ဆုကို လက်လွှတ်ရမယ့်အစား အလုပ်ထွက်ဖို့ပဲ ရွေးချယ်ခဲ့ပါတယ်။

ဒီဇာတ်လမ်းက ရှန်ဟိုင်းအခြေစိုက် အလုပ်သင်ဝန်ထမ်းလေးတစ်ယောက်ဆီက စတာပါ။ ပြီးခဲ့တဲ့ နိုဝင်ဘာ ၁၄ ရက်နေ့တုန်းက Suzhou မြို့မှာလုပ်တဲ့ Nvidia Roadshow ပွဲကို ကုမ္ပဏီစရိတ်ငြိမ်းနဲ့ သူ့ကို စေလွှတ်ခဲ့ပါတယ်။ ပွဲအတွင်းမှာ ပရိသတ်တွေအတွက် ကံစမ်းမဲအစီအစဉ်ပါလာတော့ သူလည်း ဝင်ကံစမ်းခဲ့ရာကနေ ယွမ် ၃,၀၀၀ (အမေရိကန်ဒေါ်လာ ၄၂၂ ခန့်) တန်ကြေးရှိတဲ့ RTX 5060 တစ်ကတ် ကံထူးသွားခဲ့ပါတယ်။ ပြဿနာကတော့ အဲ့ဒီနေ့ညနေမှာပဲ စတာပါပဲ။ လုပ်ဖော်ကိုင်ဖက်တစ်ယောက်က ကုမ္ပဏီဘဏ္ဍာရေးဌာနက ဒီကိစ္စကို သိသွားပြီဖြစ်ကြောင်းနဲ့ ခရီးစရိတ်အားလုံးကို ကုမ္ပဏီက ကျခံထားတာဖြစ်တဲ့အတွက် ဒီဆုကို ကုမ္ပဏီဆီ ပြန်အပ်ရမယ်လို့ လာပြောပါတယ်။ ဒါပေမဲ့ နောက်ပိုင်းမှ အလုပ်သင်ကောင်လေး စုံစမ်းသိရှိလိုက်ရတာက ဘဏ္ဍာရေးဌာနက ဒီကိစ္စကို ဘာမှမသိသေးဘဲ သူ့ရဲ့လုပ်ဖော်ကိုင်ဖက်က မနာလိုဖြစ်ပြီး ဂျင်းထည့်တာ ဖြစ်နေပါတယ်။

နောက်ဆုံးတော့ မနာလိုတဲ့လုပ်ဖော်ကိုင်ဖက်ရဲ့ ကျေးဇူးကြောင့် ကုမ္ပဏီက ဒီကိစ္စကို တကယ်သိသွားပြီး ဆုပစ္စည်းကို ပြန်အပ်ခိုင်းပါတော့တယ်။ စီမံခန့်ခွဲမှုပိုင်းက အကြီးအကဲတွေက သူ့ကို အကြိမ်ကြိမ် ခေါ်တွေ့ပြီး ကုမ္ပဏီပိုက်ဆံနဲ့သွားတဲ့ခရီးစဉ်မှာ ရလာတဲ့အရာဖြစ်လို့ ဒါဟာ ကုမ္ပဏီပိုင်ပစ္စည်းဖြစ်တယ်လို့ ပြောဆိုဖိအားပေးကြပါတယ်။ ဘယ်လောက်ပဲ ဖိအားပေးပေး ကောင်လေးကတော့ RTX 5060 ကို ပြန်မပေးခဲ့ပါဘူး။ ကုမ္ပဏီဘက်က သူ့ကို အလုပ်ထုတ်မယ်လို့ တိုက်ရိုက်မပြောပေမယ့် HR ဌာနက "တခြားကုမ္ပဏီအသစ် ရှာကြည့်ပါလား" လို့ သွယ်ဝိုက်ပြောဆိုလာတာကြောင့် နိုဝင်ဘာ ၁၉ ရက်နေ့မှာ သူကိုယ်တိုင်ပဲ အလုပ်ထွက်စာ တင်လိုက်ပါတော့တယ်။

ရှေ့နေတွေရဲ့ သုံးသပ်ချက်အရတော့ ဝန်ထမ်းတစ်ယောက် ရလာတဲ့ဆုဟာ သူ့ရဲ့ လုပ်ငန်းတာဝန်စွမ်းဆောင်ရည်ကြောင့် ရတာလား၊ ကံတရားသက်သက်ကြောင့် ရတာလားဆိုတဲ့အပေါ်မှာ မူတည်ပြီး ပိုင်ဆိုင်မှုကွဲပြားတယ်လို့ ဆိုပါတယ်။ ကုမ္ပဏီဘက်က ဝန်ထမ်းတွေ ခရီးသွားနေစဉ် ပြိုင်ပွဲတွေ၊ ကံစမ်းမဲတွေမှာ ပါဝင်ရင် ရလာတဲ့ဆုကို ကုမ္ပဏီပိုင်တယ်ဆိုတဲ့ တိကျတဲ့စည်းကမ်း သတ်မှတ်ထားတာမရှိရင် ဥပဒေအရ တောင်းပိုင်ခွင့်မရှိပါဘူး။

ဒေါ်လာ ၄၀၀ တန် ပစ္စည်းလေးတစ်ခုအတွက်နဲ့ ကုမ္ပဏီတစ်ခုလုံးရော လုပ်ဖော်ကိုင်ဖက်တွေပါ ဒီလောက်အထိ သဘောထားသေးသိမ်တာကို ကြည့်ရင် ကောင်လေး အလုပ်ထွက်လိုက်တာ မှန်တယ်လို့ပဲ ပြောရမှာပါ။ အနည်းဆုံးတော့ RTX 5060 လေး သူ့လက်ထဲ ကျန်ခဲ့တာပေါ့။ Steam ရဲ့ နောက်ဆုံး စစ်တမ်းတွေအရဆိုရင်လည်း RTX 5060 ဟာ အောက်တိုဘာလအတွင်း အသုံးပြုသူနှုန်းထား ၁.၃% အထိ တိုးတက်လာပြီး တတိယစွမ်းဆောင်ရည်အကောင်းဆုံး GPU အဖြစ် ရပ်တည်နေတဲ့ Graphics Card ဖြစ်နေပါတယ်။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။ 

Source: TechSpot