OpenAI နှင့် ပြိုင်ဆိုင်မှု ပြင်းထန်လာချိန်တွင် Google က Gemini 3 ကို မိတ်ဆက်

Image: Google

Google ဟာ AI နည်းပညာပိုင်းမှာ နောက်ကျကျန်နေတယ်ဆိုပြီး နှစ်အတော်ကြာ ဝေဖန်ခံခဲ့ရပြီးနောက်မှာ OpenAI နဲ့ Anthropic လို start-up ကုမ္ပဏီလေးတွေကို ယှဉ်ပြိုင်ဖို့အတွက် အရှိန်မြှင့်လိုက်ပါပြီ။ ပြီးခဲ့တဲ့အင်္ဂါနေ့မှာပဲ Google က Gemini 3 လို့ခေါ်တဲ့ AI မော်ဒယ်အသစ်ကို မိတ်ဆက်လိုက်ပါတယ်။ 

ဒီမော်ဒယ်က အရင်ဗားရှင်းတွေထက် software ပရိုဂရမ်ရေးတာ၊ အီးမေးလ်စီမံတာနဲ့ စီးပွားရေးစာရွက်စာတမ်းတွေကို ခွဲခြမ်းစိတ်ဖြာတာတွေမှာ ပိုမိုကောင်းမွန်လာပါတယ်။ ဒါ့အပြင် ခရီးသွားအစီအစဉ်တွေ၊ သမိုင်းကြောင်း ဒါမှမဟုတ် အနုပညာနဲ့ပတ်သက်တဲ့ တောင်းဆိုမှုတွေကို တုံ့ပြန်တဲ့အခါမှာ ရုပ်ပုံတွေနဲ့ စာသားတွေကို ရောနှောပြီး ပြသပေးနိုင်စွမ်းလည်း ရှိပါတယ်။

ဒီမော်ဒယ်ဟာ ဦးဆောင်မှုရယူဖို့ ယှဉ်ပြိုင်နေတဲ့ AI ပရောဂျက်ကြီးတွေထဲက တစ်ခုဖြစ်ပြီး Gemini app ထဲမှာ ရရှိနိုင်မယ့်အပြင် ဒီနှစ်အစောပိုင်းက မိတ်ဆက်ခဲ့တဲ့ စကားပြောပုံစံ ရှာဖွေနိုင်တဲ့ AI Mode ကနေတစ်ဆင့် Google Search မှာ မေးမြန်းတာတွေကို ဖြေကြားရာမှာလည်း အသုံးပြုသွားမယ်လို့ Google က ဆိုပါတယ်။ Google ရဲ့ မော်ဒယ်အသစ် ထွက်ရှိလာမှုဟာ AI ပြိုင်ပွဲကို စတင်ခဲ့တဲ့ ကုမ္ပဏီတွေအတွင်းမှာ စိုးရိမ်ပူပန်မှုတွေကို မြင့်တက်စေခဲ့ပါတယ်။ 

Google ရဲ့ အနီးကပ်ဆုံး ပြိုင်ဘက်တွေဖြစ်တဲ့ OpenAI နဲ့ Anthropic မှာရှိတဲ့ ဝန်ထမ်းတွေကတော့ အကယ်၍ Google ရဲ့ မော်ဒယ်တွေက ကိုယ်တိုင်ကုဒ်ရေးတာမျိုးနဲ့ ပုံဖန်တီးတာမျိုးတွေမှာ သူတို့ထက် သာလွန်သွားခဲ့ရင် သူတို့စီးပွားရေးအတွက် မကောင်းဘူးလို့ ခန့်မှန်းပြောဆိုနေကြကြောင်း အတွင်းသိသူနှစ်ဦးက ပြောပါတယ်။

JonesTrading က ဈေးကွက်မဟာဗျူဟာမှူး Mike O’Rourke ကလည်း Google ရဲ့ အရွယ်အစားနဲ့ Search ပိုင်းမှာ ဦးဆောင်သူဖြစ်နေတဲ့ အားသာချက်တွေကြောင့် Gemini က ဈေးကွက်ဝေစုကို ရယူသွားနိုင်ပြီး OpenAI နဲ့ တခြားသူတွေကို နောက်ကောက်ကျကျန်ရစ်စေနိုင်တယ်လို့ သုံးသပ်ပါတယ်။ Gemini ဘက်ကို အခုလို ဦးလှည့်လာတာက ဈေးကွက်ထဲမှာ ဂယက်ထသွားနိုင်ပြီး OpenAI က ကွန်ပျူတာတွက်ချက်မှုတွေအတွက် ဒေါ်လာဘီလီယံချီပေးဖို့ ကတိပြုထားတဲ့ Oracle နဲ့ Microsoft လို ကုမ္ပဏီတွေအတွက်လည်း မေးခွန်းထုတ်စရာတွေ ဖြစ်လာနိုင်ပါတယ်။

AI နည်းပညာရဲ့ ကုန်ကျစရိတ်တွေ မြင့်တက်လာတာနဲ့အမျှ ဒီနည်းပညာက ဖန်တီးပေးတဲ့ စီးပွားရေးအခွင့်အလမ်းတွေကရော တန်ရဲ့လားဆိုတဲ့ မေးခွန်းတွေလည်း ထွက်ပေါ်နေပါတယ်။ လက်ရှိ AI စနစ်တွေကို အဓိကအားဖြင့် အင်တာနက်ရှာဖွေမှုတွေနဲ့ ကွန်ပျူတာပရိုဂရမ်ရေးဆွဲရာမှာ ကူညီဖို့လောက်ပဲ သုံးနေကြတာပါ။

ဒါပေမဲ့ ဒီနည်းပညာက ဈေးကြီးတဲ့ စူပါကွန်ပျူတာတွေနဲ့ ပြည့်နှက်နေတဲ့ ကြီးမားတဲ့ ဒေတာစင်တာတွေ လိုအပ်ပြီး ၂၀၃၀ ခုနှစ်ရောက်ရင် ဒီအတွက် ကုန်ကျစရိတ်က ဒေါ်လာ ၇ ထရီလီယံနီးပါး ရှိလာမယ်လို့ McKinsey & Company က ခန့်မှန်းထားပါတယ်။ Anthropic၊ OpenAI၊ Microsoft နဲ့ Google တို့အနေနဲ့ သူတို့သုံးလိုက်တဲ့ငွေကြေးပမာဏကို ကာမိလောက်အောင် ရောင်းအားရပါ့မလားဆိုတာကို ရင်းနှီးမြှုပ်နှံသူတွေက သံသယဝင်လာကြပါပြီ။

Creative Strategies က လေ့လာဆန်းစစ်သူ Ben Bajarin ကတော့ ဝင်ငွေတွေ စီးဆင်းလာတာကို မြင်ရဖို့ဆိုရင် အရမ်းစွမ်းဆောင်ရည်မြင့်ပြီး အရည်အသွေးကောင်းတဲ့ အသုံးပြုမှုပုံစံတွေကို မြင်တွေ့ရဖို့ လိုအပ်ကြောင်းနဲ့ လက်ရှိမှာ အဲ့ဒီအဆင့်ကို မရောက်သေးကြောင်း ပြောကြားခဲ့ပါတယ်။ (New York Times သတင်းစာကတော့ OpenAI နဲ့ Microsoft ကို မူပိုင်ခွင့်ချိုးဖောက်မှုနဲ့ တရားစွဲဆိုထားပြီး ကုမ္ပဏီနှစ်ခုလုံးကတော့ ဒီစွပ်စွဲချက်တွေကို ငြင်းဆိုထားပါတယ်။)

သတင်းစာရှင်းလင်းပွဲတစ်ခုမှာ Google က စံသတ်မှတ်ထားတဲ့ စမ်းသပ်ချက်တစ်ခုအရ Gemini 3 ထုတ်ပေးတဲ့ အချက်အလက်တွေဟာ ၇၂ ရာခိုင်နှုန်း တိကျမှန်ကန်မှုရှိတယ်လို့ ပြောပါတယ်။ ဒါဟာ ဒီလို AI မော်ဒယ်မျိုးအတွက် မြင့်မားတဲ့နှုန်းထားဖြစ်ပေမယ့် Google ရှာဖွေရေးအင်ဂျင်ကို မောင်းနှင်မယ့် နည်းပညာတစ်ခုအပေါ် သာမန်အသုံးပြုသူတွေ မျှော်လင့်ထားတဲ့ အနေအထားတော့ ဟုတ်ချင်မှ ဟုတ်ပါလိမ့်မယ်။ ကုမ္ပဏီရဲ့အဆိုအရ Gemini ဟာ တခြားဦးဆောင်မော်ဒယ်တွေထက် စံနှုန်းသတ်မှတ်ချက်အတော်များများမှာ အမှတ်ပိုကောင်းနေပါတယ်။

Google ရဲ့ AI ဌာနက နည်းပညာအရာရှိချုပ် Koray Kavukcuoglu ကတော့ Gemini ကို ရှာဖွေရေးအင်ဂျင်မှာ အသုံးပြုလိုက်ရင် တိကျမှန်ကန်မှု ပိုကောင်းလာမယ်လို့ ညွှန်ပြခဲ့ပါတယ်။ ရှာဖွေရေးအင်ဂျင်နဲ့ တွဲဖက်လိုက်တဲ့အခါ မော်ဒယ်အသစ်ဟာ အင်တာနက်က အချက်အလက်တွေကို ချက်ချင်းရှာဖွေနိုင်ပြီး အချက်အလက်တချို့ကို အတည်ပြုပေးနိုင်မှာဖြစ်ပေမယ့် ဒီအလုပ်လုပ်ပုံကလည်း အကန့်အသတ်တော့ ရှိပါသေးတယ်။

Oumi ရဲ့ ပူးတွဲတည်ထောင်သူ Manos Koukoumidis ကတော့ လူတွေက Google ကို ဝင်ကြည့်တဲ့အခါ လင့်ခ်အပြာရောင်တွေ လိုက်နှိပ်ပြီး ကိုယ်တိုင်အလုပ်လုပ်ရမယ့်ဒုက္ခကနေ ကယ်တင်ပေးမယ်လို့ မျှော်လင့်နေကြတာဖြစ်ပြီး လက်ရှိအခြေအနေကတော့ အဲ့ဒီလောက်ကောင်းမွန်တဲ့အဆင့်ကို ရောက်ဖို့ အများကြီးလိုသေးတယ်လို့ ဆိုပါတယ်။

Google ဟာ Gemini ဖြန့်ဖြူးမှုအပိုင်းမှာလည်း တိုးတက်မှုတွေ လုပ်ဆောင်ထားပါတယ်။ မတ်လတုန်းက လစဉ်အသုံးပြုသူ ၃၅၀ သန်းရှိခဲ့ရာကနေ အခုဆိုရင် ၆၅၀ သန်းအထိ ရှိလာပြီလို့ ကုမ္ပဏီက ဆိုပါတယ်။ နှိုင်းယှဉ်ကြည့်မယ်ဆိုရင် OpenAI ကတော့ သူတို့ဆီမှာ အပတ်စဉ် အသုံးပြုသူ သန်း ၇၀၀ လောက်ရှိတယ်လို့ ပြောပါတယ်။

 အသုံးပြုသူ ပိုများလာစေဖို့အတွက် ကုမ္ပဏီဟာ အမေရိကန်က တက္ကသိုလ်ကျောင်းသားတွေကို Google AI Pro ဝန်ဆောင်မှုကို အခမဲ့ပေးသွားမှာဖြစ်ပြီး ဒါက ကျောင်းသားတွေအတွက် တစ်နှစ်ကို ဒေါ်လာ ၂၄၀ လောက် သက်သာစေမှာပါ။ ဒါဟာ ဒီနှစ်အတွင်း Google က အခုလိုကမ်းလှမ်းတာ ဒုတိယအကြိမ်လည်း ဖြစ်ပါတယ်။

ကုမ္ပဏီပေါင်း နှစ်ဒါဇင်လောက်က သူတို့ရဲ့ ဒေတာတွေကို ခွဲခြမ်းစိတ်ဖြာဖို့နဲ့ ဘာသာစကားမျိုးစုံပါဝင်တဲ့ အစည်းအဝေးတွေကို တိတိကျကျ မှတ်တမ်းတင်ဖို့အတွက် Gemini 3 ကို စတင်အသုံးပြုနေကြပြီလို့ Google က ပြောပါတယ်။ ဒီအက်ပ်က အီးမေးလ် inbox တွေကို စီမံပေးတာနဲ့ အီးမေးလ်အပြန်အလှန် ရေးသားပေးတာမျိုးတွေလည်း လုပ်ဆောင်နိုင်ပါတယ်။

Mr. Bajarin ကတော့ ဒီစွမ်းရည်တွေက Google အနေနဲ့ Microsoft၊ Amazon တို့နဲ့ cloud computing ဖောက်သည်တွေ ရရှိရေး ယှဉ်ပြိုင်ရာမှာ အထောက်အကူဖြစ်စေနိုင်တယ်လို့ ပြောပါတယ်။ ပြီးခဲ့တဲ့လတုန်းကလည်း ကုမ္ပဏီရဲ့ cloud စီးပွားရေးကဏ္ဍကနေရရှိတဲ့ ဝင်ငွေဟာ AI လိုအပ်ချက် မြင့်မားမှုကြောင့် သုံးပုံတစ်ပုံလောက် တက်လာပြီး ဒေါ်လာ ၁၅ ဘီလီယံအထိ ရှိခဲ့တယ်လို့ သတင်းထုတ်ပြန်ခဲ့ပါတယ်။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။ 

Source: The New York Times