ဒေါ်လာ ၅၀၀၀ ကျော်သာ ကျသင့်ပြီး သိပ္ပံစိတ်ကူးယဉ်ကမ္ဘာနှင့် ပိုမိုနီးစပ်လာစေမည့် Unitree ၏ R1 လူသားစက်ရုပ်

Image via TechSpot

Elon Musk က အိမ်တိုင်းမှာ လူသားပုံစံစက်ရုပ်တစ်ရုပ်စီ ရှိလာမယ့်ကမ္ဘာကို စိတ်ကူးယဉ်မိတယ်လို့ အမြဲပြောဆိုလေ့ရှိပေမဲ့ ဒီလိုအခြေအနေကို လက်တွေ့မဖြစ်လာအောင် တားဆီးထားတဲ့အချက်တစ်ခုကတော့ စက်ရုပ်တွေရဲ့ ဈေးနှုန်းပါပဲ။ ဒါပေမဲ့ Unitree ရဲ့ R1 နဲ့ဆိုရင်တော့ ဒီလိုသိပ္ပံစိတ်ကူးယဉ်ကမ္ဘာထဲကို ဝင်ရောက်မဲ့ ကုန်ကျစရိတ်ကတော့ အများကြီး ကျဆင်းသွားပါပြီ။

တရုတ်နိုင်ငံအခြေစိုက်စက်ရုပ်ကုမ္ပဏီတစ်ခုဖြစ်တဲ့ Unitree Robotics က ထုတ်လုပ်တဲ့ R1 ဟာ အရပ်လေးပေမြင့်ပြီး အဆစ် ၂၆ ခုပါဝင်ကာ ၅၅ ပေါင်လောက် အလေးချိန် ရှိပါတယ်။

Boston Dynamics ရဲ့ လူသားပုံစံစက်ရုပ်တွေလိုပဲ R1 ဟာ အထင်ကြီးလောက်စရာ ကျွမ်းဘားကစားနည်းတချို့ကို လုပ်ဆောင်နိုင်ပါတယ်။ ကုမ္ပဏီရဲ့ဗီဒီယိုထဲမှာ သူက ဘေးတိုက်ဂျွမ်းထိုးတာတွေ ကင်းမြီးကောက်ထောင်ပြတာတွေကို တွေ့ရမှာဖြစ်ပါတယ်။ လက်ဝှေ့ထိုးတာနဲ့ ကိုယ်ခံပညာရပ်တွေမှာလည်း တော်တော်လေး ကျွမ်းကျင်ပုံရပြီး Boston Dynamics စက်ရုပ်တွေလို ကနိုင်သလို ပြေးလည်း ပြေးနိုင်ပါတယ်။

R1 လိုမျိုး လူသားပုံစံစက်ရုပ်တွေက ဈေးနှုန်းကြီးမြင့်လေ့ရှိပေမဲ့ R1 ကိုတော့ ဒေါ်လာ ၅,၉၀၀ နဲ့ ရောင်းချပေးနေပါတယ်။ နှိုင်းယှဉ်ကြည့်ရရင် Unitree ရဲ့ ကိုယ်ပိုင် G1 ကတောင် ဈေးအသက်သာဆုံးမော်ဒယ်တွေထဲကတစ်ခုဖြစ်ပြီး ဒေါ်လာ ၁၆,၀၀၀ ရှိသလို H1 ကတော့ ဒေါ်လာ ၉၀,၀၀၀ အထိ ရှိပါတယ်။ Figure AI မှာဆိုရင်လည်း Figure 02 ရှိပြီး ဒေါ်လာ ၃၀,၀၀၀ ကျော်လောက် ကျသင့်မှာဖြစ်ပါတယ်။

R1 ဟာ ကိုယ်ကာယပိုင်းဆိုင်ရာ ကျွမ်းကျင်မှုတွေထက် ပိုလုပ်နိုင်ပါသေးတယ်။ သူမှာ မျက်လုံးနှစ်လုံးဖြင့် အမြင်အာရုံပိုင်ဆိုင်ထားသလို LLM အသုံးပြုပြီး အသံနဲ့ ပုံရိပ်တွေကို ခွဲခြားနိုင်စွမ်းတွေ ပါဝင်ပါတယ်။ ဒါ့အပြင် Wi-Fi 6 နဲ့ Bluetooth 5.2 ချိတ်ဆက်နိုင်စွမ်းတွေလည်း ပါဝင်ပါသေးတယ်။

ဗီဒီယိုထဲမှာ R1 ရဲ့ လျင်မြန်မှုကိုပဲ ပြထားပေမဲ့ ဒီစက်ရုပ်ဟာ အသံနဲ့ပေးတဲ့အမိန့်တွေကို တုံ့ပြန်နိုင်ပြီး စကားစမြည်တွေကို အနည်းငယ်ပြောဆိုနိုင်ပါတယ်။ ဗီဒီယိုကလစ်ရဲ့ အဆုံးက စာတန်းမှာတော့ "လှုပ်ရှားမှုကို ဦးစားပေးမယ် လုပ်ငန်းတာဝန်တွေကိုလည်း ဆောင်ရွက်နိုင်တယ်" လို့ ရေးသားထားပါတယ်။ ဒါတင်မက ဝယ်ယူသူတွေအနေနဲ့ သူတို့ရဲ့စက်ရုပ်တွေကို စိတ်ကြိုက်ပြင်ဆင်နိုင်တယ်လို့လည်း ဗီဒီယိုက ကတိပေးထားပါသေးတယ်။

Unitree က စက်ရုပ်တွေနဲ့တိုက်ခိုက်ကြတဲ့ ၂၀၁၁ ခုနှစ်က  "Real Steel" ရုပ်ရှင်ကိုလည်း နှစ်သက်ပုံရပါတယ်။ ကုမ္ပဏီက ပထမဆုံးအကြိမ် လူသားပုံစံစက်ရုပ် တိုက်ခိုက်ရေးပြိုင်ပွဲလို့ ခေါ်တဲ့ပွဲကို ကျင်းပခဲ့ပေမဲ့ ကြည့်ရတာတော့ သတ္တုကလေးငယ်နှစ်ယောက် ခြေလက်တွေနဲ့ ယမ်းခါပြီး ကိုးရိုးကားရားတိုက်ခိုက်နေကြပုံနဲ့ ပိုတူပါတယ်။

ဗီဒီယိုထဲမှာ နားလည်ရခက်ပြီး မကောင်းတဲ့နိမိတ်ပြနေသလိုဖြစ်တဲ့ သတိပေးချက်တချို့လည်း ပါဝင်ပါသေးတယ်။ "လက်ရှိမှာ ကမ္ဘာ့လူသားပုံစံစက်ရုပ်လုပ်ငန်းက စူးစမ်းရှာဖွေမှုရဲ့ အစောပိုင်းအဆင့်မှာပဲ ရှိပါသေးတယ်။ တစ်ဦးချင်းအသုံးပြုသူတွေအနေနဲ့ မဝယ်ယူခင်မှာ လူသားပုံစံစက်ရုပ်တွေရဲ့ ကန့်သတ်ချက်တွေကို သေချာနားလည်အောင်လုပ်ထားဖို့ အလေးအနက် အကြံပြုပါတယ်" လို့ အဆုံးသတ်မှာ စာတန်းထိုးထားပါတယ်။

"လူသားပုံစံစက်ရုပ်မှာ ရှုပ်ထွေးတဲ့ဖွဲ့စည်းပုံသလို ခွန်အားလည်းကောင်းမွန်ပါတယ်။ အသုံးပြုသူတွေအနေနဲ့ လူသားပုံစံစက်ရုပ်နဲ့ လုံလောက်တဲ့ ဘေးကင်းတဲ့အကွာအဝေးမှာ ထားရှိပေးဖို့ တောင်းဆိုပါတယ်။ ဂရုပြု သုံးစွဲပါ" လို့ ဆိုထားပါတယ်။

အဲ့ဒီသတိပေးချက်ရဲ့ ဒုတိယအပိုင်းက မေလတုန်းက ဖြစ်ခဲ့တဲ့ အဖြစ်အပျက်တစ်ခုကို ပြန်သတိရစေပါတယ်။ Unitree ရဲ့ H1 စက်ရုပ်တစ်ရုပ် စက်ရုံတစ်ခုထဲမှာ ထိန်းမနိုင်သိမ်းမရ ဖြစ်သွားပြီး အလုပ်သမားတွေကိုတောင် ထိခိုက်လုနီးပါးဖြစ်ခဲ့တဲ့ ဗီဒီယိုတစ်ခု ဆိုရှယ်မီဒီယာမှာ ပြန့်နှံ့ခဲ့ပါတယ်။

R1 ဟာ "Detroit: Become Human" ဂိမ်းထဲကလို အိမ်အကူစက်ရုပ်တွေလိုဖြစ်လာဖို့ အများကြီးလိုသေးတယ်ဆိုပေမဲ့ သူ့ရဲ့ဈေးနှုန်းက ဒေါ်လာ ၆,၀၀၀ အောက်ဖြစ်နေတဲ့အချက်က ဒီနည်းပညာဟာ ဘယ်လောက်တောင် ဈေးသက်သာလာပြီလဲဆိုတာကို ပြသလို့နေပါတယ်။ ဒါက ကျွန်တော်တို့ခန့်မှန်းထားတာထက် ပိုမိုအဆင့်မြင့်ပြီး အမြောက်အများထုတ်လုပ်တဲ့ မော်ဒယ်တွေ မြန်မြန်ဆန်ဆန်ပေါ်ပေါက်လာနိုင်ပါတယ်။

Source: TechSpot