Acer ၏ CEO က ၂၀၂၇ တွင် ကွန်ပျူတာဈေးနှုန်းများ ပြန်လည်ကျဆင်းနိုင်ဟုဆို ပြိုင်ဘက်များက RAM ပြတ်လပ်မှုကို အကြောင်းပြ၍ အမြတ်ထုတ်နေဟု စွပ်စွဲ

Image: Remitski via Getty Images

မန်မိုရီထုတ်လုပ်တဲ့ အဓိကကုမ္ပဏီကြီးတွေရဲ့ CEO တွေက လက်ရှိ ဖြစ်ပေါ်နေတဲ့ မန်မိုရီ ပြတ်လပ်မှုဟာ ဘယ်လောက်အထိ ကြာမြင့်မယ်ဆိုတာနဲ့ ပတ်သက်ပြီး အမျိုးမျိုး ခန့်မှန်းထားကြပေမဲ့ Acer ကတော့ အကောင်းမြင်ဆုံး သုံးသပ်ချက်ကို ပေးထားပါတယ်။ Acer ရဲ့ CEO က တခြားကုမ္ပဏီတွေဟာ အမြတ်ရာခိုင်နှုန်းကို ပိုမိုလိုချင်တာကြောင့် ခန့်မှန်းချက်တွေကို အလွန်အကျွံ လုပ်ပြနေကြတာဖြစ်ပြီး၊ လာမယ့်နှစ်ကုန်ပိုင်းမှာတော့ ဒီဆိုးရွားတဲ့ အခြေအနေတွေ ကျော်လွန်သွားနိုင်တယ်လို့ ယူဆထားပါတယ်။

Acer ရဲ့ CEO ဖြစ်သူ Jason Chen က RAM ပြတ်လပ်မှုကြောင့် မြင့်တက်နေတဲ့ ကွန်ပျူတာ (PC) ဈေးနှုန်းတွေဟာ ၂၀၂၇ ခုနှစ် နှစ်ကုန်ပိုင်းလောက်မှာ ပြန်လည်ကျဆင်းလာနိုင်တယ်လို့ မကြာသေးမီက DigiTimes နဲ့ အင်တာဗျူးမှာ ပြောကြားခဲ့ပါတယ်။ ဒီပြောကြားချက်ဟာ ဒီအခြေအနေကြီးဟာ အနည်းဆုံး ၂၀၃၀ အထိ ဆက်လက်ဖြစ်ပွားနေမယ်လို့ အခြား မန်မိုရီထုတ်လုပ်သူ ကုမ္ပဏီ CEO တွေရဲ့ မူလခန့်မှန်းချက်တွေနဲ့ ဆန့်ကျင်လို့နေပါတယ်။

DRAM ဈေးနှုန်းတွေဟာ မနှစ်ကတည်းက AI ဒေတာစင်တာတွေ ဆောက်လုပ်မှုကြောင့် ဝယ်လိုအား အလွန်အမင်း မြင့်တက်လာခဲ့ပြီး ၅ ဆအထိ မြင့်မားလာခဲ့တာကြောင့် ထုတ်လုပ်သူတွေအနေနဲ့ RAM ပမာဏ အများကြီးသုံးရတဲ့ စက်ပစ္စည်းတိုင်းရဲ့ ဈေးနှုန်းတွေကို မြှင့်တင်ခဲ့ကြရပါတယ်။ PC တွေ၊ စမတ်ဖုန်းတွေ၊ Graphics Card တွေနဲ့ ဂိမ်းစက်တွေအပြင် CPU နဲ့ Motherboard တွေရဲ့ ဝယ်လိုအားအပေါ်မှာပါ ရိုက်ခတ်မှုတွေ ရှိခဲ့ပါတယ်။ မကြာသေးမီက ပြုလုပ်ခဲ့တဲ့ လေ့လာမှုတစ်ခုအရ လက်ရှိ မန်မိုရီဈေးကွက်ဟာ စက်တစ်လုံးချင်းစီရဲ့ ပမာဏအလိုက် ကြည့်မယ်ဆိုရင် လွန်ခဲ့တဲ့ ဆယ်စုနှစ်နှစ်ခုနီးပါးက အခြေအနေနဲ့ အလွန်တူညီနေတာကို တွေ့ရပါတယ်။

ဒီလို ပြတ်လပ်မှုနဲ့ ဈေးနှုန်းမြင့်တက်မှုတွေ ဘယ်လောက်အထိ ကြာမြင့်မလဲဆိုတဲ့ အပေါ်မှာတော့ ခန့်မှန်းချက်တွေ ပုံစံအမျိုးမျိုး ကွဲပြားနေပါတယ်။ ယခုနှစ် အစောပိုင်းတုန်းက Micron ရဲ့ CEO ဖြစ်သူ Sanjay Mehrotra က ဒီအခြေအနေဟာ ၂၀၂၇ ခုနှစ်လွန်တဲ့အထိ ဆက်လက်ဖြစ်ပွားနေမယ်လို့ ခန့်မှန်းခဲ့ပါတယ်။ အဲဒီနောက် မကြာမီမှာပဲ SK Hynix ရဲ့ CEO Kwak Noh-Jung ကလည်း ပြတ်လပ်မှုတွေဟာ ၂၀၂၇ မှာ အမြင့်ဆုံး ရောက်ရှိမှာဖြစ်ပြီး ၂၀၃၀ အထိ ကုန်ကြမ်းရရှိမှု နည်းပါးနေဦးမယ်လို့ ဆိုခဲ့ပါတယ်။

Adata ရဲ့ ဥက္ကဋ္ဌ ဖြစ်သူ Chen Li-bai ကတော့ အဓိက မန်မိုရီထုတ်လုပ်သူတွေရဲ့ စက်ရုံတိုးချဲ့ရေး စီမံကိန်းတွေ ရှိနေပေမဲ့လည်း ဈေးနှုန်းတက်နေတာဟာ နောက်ထပ် ဆယ်စုနှစ်တစ်ခုစာအထိ ကြာမြင့်ဦးမယ်လို့ အဆိုးဆုံး ခန့်မှန်းထားခဲ့တာပါ။

ဒါပေမဲ့ Acer ရဲ့ CEO ကတော့ ဒီအခြေအနေကို အခြားတစ်မျိုး မြင်ထားပါတယ်။ Chen ရဲ့ စွပ်စွဲချက်အရ အဆိုပါ ခန့်မှန်းချက်တွေဟာ ကုန်ကြမ်းရရှိနိုင်မှု အရှိတရားထက် AI ခေတ်ရေစီးကြောင်းကြောင့် ရရှိထားတဲ့ မန်မိုရီထုတ်လုပ်သူတွေရဲ့ အမြတ်အစွန်းကြီးကြီးမားမားကို ဆက်လက်ထိန်းသိမ်းထားချင်တာကြောင့်သာ ဖြစ်တယ်လို့ ဆိုပါတယ်။ သူက လက်ရှိမှာ RAM နဲ့ SSD အများစုရဲ့ ထုတ်လုပ်နိုင်စွမ်းဟာ ဝယ်လိုအားကို မီနေပြီဖြစ်ပြီး၊ အခုဖြစ်နေတဲ့ ပြတ်လပ်မှုတွေဟာ အမြင့်စား အစိတ်အပိုင်းတွေဖြစ်တဲ့ အမြန်ဆုံး DDR5 Module တွေနဲ့ Nvidia ရဲ့ N1X လိုမျိုး CPU တွေမှာပဲ အကန့်အသတ်နဲ့ ဖြစ်ပေါ်နေတာလို့ အခိုင်အမာ ပြောကြားခဲ့တာပါ။

Chen ရဲ့ ခန့်မှန်းချက်အရ ယခုနှစ် နှောင်းပိုင်းမှာ PC ဈေးနှုန်းတွေဟာ ၅ ရာခိုင်နှုန်းကနေ ၂၀ ရာခိုင်နှုန်းအထိ ထပ်မံမြင့်တက်လာနိုင်ပြီး၊ ၂၀၂၇ ခုနှစ် ပထမခြမ်းမှာ ထိပ်ဆုံးကို ရောက်ရှိသွားကာ အဲဒီနောက်မှာမှ ဈေးနှုန်းတွေ စတင်လျော့ကျလာမယ်လို့ မျှော်လင့်ရပါတယ်။ ဒီလို ဈေးနှုန်း ပြန်ကျလာဖို့အတွက် တရုတ်နိုင်ငံက CXMT လို ထုတ်လုပ်သူတွေဆီက ရရှိလာမယ့် ဈေးသက်သာတဲ့ ကုန်ကြမ်းအသစ်တွေက အဓိက အခန်းကဏ္ဍကနေ ပါဝင်နေပြီး CXMT ဟာ ပင်တာဂွန်ရဲ့ အမည်မည်းစာရင်းထဲမှာ ပါဝင်နေတုန်းဆိုပေမဲ့ Apple အနေနဲ့ ကုန်ကျစရိတ် ဖိအားကို လျှော့ချဖို့အတွက် CXMT ကို ထောက်ပံ့သူအဖြစ် အသုံးပြုဖို့ စဉ်းစားနေတယ်လို့ မကြာသေးမီက သတင်းတွေမှာ ဖော်ပြထားပါတယ်။

Source: TechSpot