Elon Musk က TikTok ကို ဝယ်ယူရန် စိတ်ဝင်စားမှုမရှိဟုဆို

Image via TechSpot

TikTok ရဲ့ အမေရိကန်လုပ်ငန်းတွေကို ဘယ်သူဝယ်ယူမလဲဆိုတာကို ဆွေးနွေးနေဆဲဖြစ်ပေမဲ့ အရင်က ဝယ်ယူဖို့ ရေပန်းစားခဲ့သူတစ်ဦးဖြစ်တဲ့ Elon Musk က သူ့ရဲ့ စီးပွားရေးလုပ်ငန်းတွေထဲမှာ နောက်ထပ် ဆိုရှယ်မီဒီယာ platform တစ်ခုကို ထည့်သွင်းမှာမဟုတ်ဘူးလို့ဆိုပါတယ်။ ကမ္ဘာ့အချမ်းသာဆုံးပုဂ္ဂိုလ်ဖြစ်တဲ့ Elon Musk က သူဟာ အက်ပ်ကို ဝယ်ယူဖို့ စိတ်မဝင်စားကြောင်း ပြောကြားခဲ့ပြီး ကုမ္ပဏီတွေကို "အစကနေ တည်ဆောက်လေ့ရှိကြောင်း" ထပ်လောင်းပြောကြားခဲ့ပါတယ်။ ဒီသတင်းကို နောက်ထပ် ဝယ်ယူသူဖြစ်နိုင်တဲ့ Jimmy Donaldson (MrBeast) ကလည်း ကြိုဆိုခဲ့ပါတယ်။

တရုတ်အစိုးရဟာ TikTok ရဲ့ အမေရိကန်ပိုင်ဆိုင်မှုတွေကို Musk ဆီကို ရောင်းချဖို့ စဉ်းစားနေကြောင်း ဇန်နဝါရီလမှာ သတင်းထွက်ပေါ်ခဲ့ပါတယ်။ DOGE ဌာနခေါင်းဆောင်ဟာ တရုတ်နဲ့ ဆက်ဆံရေးကောင်းမွန်သူဖြစ်ပြီး တရုတ်နိုင်ငံကို အကြိမ်ပေါင်းများစွာ ချီးကျူးခဲ့ပါတယ်။ ရှန်ဟိုင်းမှာရှိတဲ့ Tesla စက်ရုံကလည်း သူ့အတွက် အစိုးရတာဝန်ရှိသူတွေနဲ့ ကောင်းမွန်တဲ့ဆက်ဆံရေးကို ရရှိစေပါတယ်။

သမ္မတဒေါ်နယ်ထရမ့်အနေနဲ့ TikTok ကို Musk (သို့မဟုတ်) Oracle အကြီးအကဲ Larry Ellison တို့တစ်ဦးဦး ဝယ်ယူနိုင်ခြေရှိတယ်လို့ ပြောခဲ့တာကလည်း X မှာ ပါဝင်လာနိုင်ကြောင်း အရိပ်အမြွက်ပြသလိုဖြစ်ခဲ့ပါတယ်။ ဒါပေမဲ့ Elon Musk ကတော့ ဝယ်ယူဖို့ စိတ်မဝင်စားကြောင်း ထုတ်ဖော်ပြောကြားလာခဲ့ပါပြီ။

စနေနေ့မှာ Musk ရဲ့ မှတ်ချက်တွေကို The WELT Group က အွန်လိုင်းမှာ ထုတ်ပြန်ခဲ့တာဖြစ်ပြီး အဆိုပါGroupဟာ ဇန်နဝါရီလနှောင်းပိုင်းမှာ Musk တက်ရောက်ခဲ့တဲ့ စီးပွားရေးထိပ်သီးအစည်းအဝေးတစ်ခုကို ကျင်းပခဲ့တဲ့ ဂျာမန်မီဒီယာကုမ္ပဏီ Axel Springer SE ရဲ့ အစိတ်အပိုင်းတစ်ခုဖြစ်ပါတယ်။

"ကျွန်တော် TikTok ကို ဝယ်ဖို့ ကမ်းလှမ်းမှု မပြုလုပ်ခဲ့ပါဘူး" လို့ Musk က ဆိုပါတယ်။ "ကျွန်တော် TikTok ကို ရဖို့ အသည်းအသန် ကြိုးပမ်းနေတာ မဟုတ်ပါဘူး။ ကျွန်တော်ကုမ္ပဏီတွေကို အများအားဖြင့် မဝယ်ယူပါဘူး။ ဒါက တော်တော်ရှားပါတယ်" လို့ သူက ထပ်လောင်းပြောပါတယ်။ "ကျွန်တော်ကုမ္ပဏီတွေကို အများအားဖြင့် အစကနေ တည်ဆောက်ပါတယ်" လို့ ဆိုပါတယ်။

Musk က သူကိုယ်တိုင်လည်း TikTok ကို အသုံးမပြုကြောင်းနဲ့ ၎င်းရဲ့ပုံစံကို ရင်းနှီးမှုမရှိကြောင်း ဆက်လက်ရှင်းပြခဲ့ပါတယ်။

Musk က ကုမ္ပဏီတွေကို မဝယ်ဘဲ အစကနေ တည်ဆောက်တယ်လို့ ပြောလိုက်တော့ ၂၀၂၂ ခုနှစ် အောက်တိုဘာလမှာ ဒေါ်လာ ၄၄ ဘီလီယံနဲ့ ဝယ်ယူခဲ့တဲ့ Twitter (အခု X) အကြောင်း မေးခွန်းတွေ ထွက်ပေါ်လာစေပါတယ်။

Twitter ကို "လွတ်လပ်စွာ ပြောဆိုခွင့်ကို ထိန်းသိမ်းဖို့" အတွက် ဝယ်ယူခဲ့တာလို့ Elon Musk ဆိုပါတယ်။ TikTok ကို ဝယ်ယူနိုင်ခြေနဲ့ ပတ်သက်ပြီးတော့ TikTok ကို ဝယ်ယူခြင်းရဲ့ နောက်ကွယ်မှာ ငွေရေးကြေးရေး အကြောင်းပြချက်တစ်ခုတည်းသာ ရှိနိုင်လို့ Twitter လို အကြောင်းပြချက်နဲ့ TikTok ကို ဝယ်ယူလို့ရမလားဆိုတာကို သေချာမသိကြောင်း သူ့အမြင်ကိုပြောကြားခဲ့ပါတယ်။

Musk ဟာ ဇန်နဝါရီလတုန်းက TikTok ကို ပိတ်ပင်လိုက်ခြင်းဟာ လွတ်လပ်စွာပြောဆိုခွင့်ကို ဆန့်ကျင်တာဖြစ်ကြောင်း ပြောကြားခဲ့ဖူးပါတယ်။ TikTok ကိုတော့ အမေရိကန်မှာ လုပ်ငန်းလည်ပတ်ခွင့်ပြုထားရပြီး X ကို တရုတ်မှာ လည်ပတ်ခွင့်မပြုခြင်းဟာ မမျှတကြောင်းနဲ့ အပြောင်းအလဲတစ်ခုခု လိုအပ်ကြောင်းလည်း သူက ပြောပါတယ်။

YouTube (နဲ့ Amazon) မှာ နာမည်ကြီးတဲ့ MrBeast ဟာ Employer.com ကို တည်ထောင်သူနဲ့ CEO ဖြစ်သူ Jesse Tinsley ဦးဆောင်တဲ့ ရင်းနှီးမြှုပ်နှံမှုအဖွဲ့ရဲ့ အစိတ်အပိုင်းတစ်ခုအနေနဲ့ TikTok ကို ဝယ်ယူဖို့ စိတ်ဝင်စားနေတယ်လို့ ယူဆရပါတယ်။ Musk က အက်ပ်ကို မဝယ်တော့ဘူးလို့ အတည်ပြုကြောင်း သတင်းကို သူက "ဟူး" လို့ တစ်ခွန်းတည်းနဲ့ အကြောင်းပြန်ခဲ့ပါတယ်။

အမေရိကန်မှာ TikTok ရဲ့ အနာဂတ်က ဘယ်လိုဖြစ်လာမလဲဆိုတာ သေချာမသိသေးပါဘူး။ သမ္မတဒေါ်နယ်ထရမ့်က ရန်ဘက်နိုင်ငံတွေရဲ့ ထိန်းချုပ်မှုအောက်မှာရှိတဲ့ အက်ပ်များမှ အမေရိကန်နိုင်ငံသားများကို ကာကွယ်ရေး ဥပဒေအရ TikTok ကို ပိတ်ပင်ဖို့ အမိန့်ထုတ်ထားတာကို ၇၅ ရက် ရွှေ့ဆိုင်းထားပြီး နောက်ဆုံးရက်က ၂၀၂၅ ခုနှစ် ဧပြီလ ၄ ရက်နေ့အထိဖြစ်ပါတယ်။ ဒါပေမဲ့ အက်ပ်က US Apple store နဲ့ Google store တွေမှာတော့ မတွေ့ရသေးပါဘူး။

Source: TechSpot