James Bond ရုပ်ရှင်ထဲကလို လုတ်တစ်ချက်နှိပ်ရုံနဲ့ ဒေတာရော Chip ပါ ကိုယ်တိုင်ဖျက်ဆီးနိုင်တဲ့ SSD

Image via TechSpot

James Bond ရုပ်ရှင်ထဲမှာ Q က Bond ရဲ့ tuxedo အင်္ကျီအိတ်ထဲကို ခိုးထည့်ပေးလိုက်တဲ့ ပစ္စည်းလို ကိုယ်တိုင်ဖျက်ဆီးနိုင်တဲ့ feature ပါဝင်တဲ့ SSD တစ်မျိုး ထွက်ရှိလာပါပြီ။ TeamGroup ကုမ္ပဏီက P250Q-M80 လို့ခေါ်တဲ့ ဒီ SSD ကို ဖန်တီးလိုက်တာဖြစ်ပြီး၊ ရုပ်ရှင်ထဲကလို သူလျှိုလုပ်ငန်းသုံး နည်းပညာကို ဒေတာလုံခြုံရေးအတွက် လက်တွေ့ဘဝထဲကို ယူဆောင်လာခဲ့ပါတယ်။ ဒီ industrial-grade သိုလှောင်ရေးကိရိယာကို ကာကွယ်ရေး၊ စက်မှုလုပ်ငန်းအလိုအလျောက်စနစ် (industrial automation) နဲ့ AI ဖွံ့ဖြိုးတိုးတက်ရေးလိုမျိုး ဒေတာလုံခြုံရေးက အလွန်အရေးကြီးတဲ့ ကဏ္ဍတွေအတွက် အထူးထုတ်လုပ်ထားတာပါ။

P250Q-M80 ရဲ့ အထူးခြားဆုံးအချက်ကတော့ ဒေတာဖျက်ဆီးတဲ့စနစ် ၂မျိုးပါဝင်တာပါပဲ။ အဓိကအချက်ကတော့ မူပိုင်ခွင့်တင်ထားတဲ့ သီးခြားဖျက်ဆီးရေး ဆားကစ်တစ်ခုပါဝင်လာတာပါ။ အသုံးပြုသူတွေအနေနဲ့ သီးသန့်ခလုတ်လေးတစ်ခုကို နှိပ်လိုက်ရုံနဲ့ ဒေတာဖျက်ဆီးခြင်း အဆင့်နှစ်မျိုးထဲက တစ်ခုကို ရွေးချယ်နိုင်မှာပါ။

ခလုတ်ကို ခဏလေးပဲဖိနှိပ်လိုက်ရင် software အခြေခံ ဖျက်ဆီးမှုကို အသက်သွင်းလိုက်မှာဖြစ်ပြီး သိမ်းဆည်းထားတဲ့ ဒေတာအားလုံးကို ဖျက်ပစ်လိုက်တယ်ဆိုပေမယ့် drive ကိုတော့ ပြန်သုံးလို့ရနေဦးမှာပါ။ ဒီလုပ်ငန်းစဉ်ကို အသိဉာဏ်မြင့်တဲ့စနစ်တစ်ခုက ထောက်ပံ့ပေးထားပြီး၊ အလုပ်လုပ်နေတုန်း မီးပျက်သွားရင်တောင် ဖျက်ဆီးခြင်းလုပ်ငန်းစဉ်ကို အလိုအလျောက် ပြန်လည်စတင်ပေးမှာဖြစ်ပြီး ဒေတာတွေကို လုံးဝပြန်ယူလို့မရတော့အောင် ပြန်လည်ဖျက်ဆီးလိုက်မှာဖြစ်ပါတယ်။

အရမ်းအရေးကြီးတဲ့အခြေအနေတွေအတွက်တော့ ခလုတ်ကို အချိန်ကြာကြာ ဖိထားလိုက်ရင် hardware အဆင့် ဖျက်ဆီးခြင်းကို အသက်သွင်းမှာဖြစ်ပါတယ်။ ဒီနည်းလမ်းက ဗို့အားမြင့်မားတဲ့လျှပ်စီးကြောင်းတစ်ခုကို အချက်အလက်တွေသိမ်းထားတဲ့ NAND flash chip တွေဆီကို တိုက်ရိုက်လွှတ်ပြီး ရုပ်ပိုင်းဆိုင်ရာအရ ဖျက်ဆီးလိုက်တာကြောင့် ဒေတာတွေကို ပြန်လည်ရယူဖို့ လုံးဝမဖြစ်နိုင်တော့ပါဘူး။ ဒီလုပ်ငန်းစဉ်ကို အဆင့်များစွာပါဝင်တဲ့ LED မီးလုံးလေးတွေကနေတစ်ဆင့် မျက်မြင်အတည်ပြုနိုင်ဦးမှာ ဖြစ်ပါတယ်။

ဒီ အဓိက feature အပြင်၊ P250Q-M80 ဟာ စက်မှုလုပ်ငန်းသုံးအဆင့် ကြမ်းတမ်းတဲ့အခြေအနေတွေကို ခံနိုင်ရည်ရှိအောင်လည်း တည်ဆောက်ပေးထားပါတယ်။ PCIe Gen4x4 interface နဲ့ NVMe 1.4 protocol ကို အသုံးပြုထားပြီး sequential read speed 7,000 MB/s အထိနဲ့ write speed 5,500 MB/s အထိ ရရှိနိုင်ပါတယ်။ အရည်အသွေးမြင့် 3D TLC NAND flash ကို အသုံးပြုထားပြီး 256GB ကနေ 2TB အထိ ပမာဏအမျိုးမျိုးနဲ့ ရရှိနိုင်ပါတယ်။ တုန်ခါမှုနဲ့ ထိခိုက်မှုဒဏ်ကို ခံနိုင်ရည်ရှိတဲ့ စစ်ဘက်ဆိုင်ရာစံနှုန်းတွေနဲ့ ကိုက်ညီသလို၊ ကြမ်းတမ်းတဲ့ပတ်ဝန်းကျင်တွေအတွက် ပြင်းထန်တဲ့အပူချိန်မှာလည်းအလုပ်လုပ်မှာပါ။ ဒါတင်မက S.M.A.R.T. လို့ခေါ်တဲ့ SSD ရဲ့အခြေအနေကို စောင့်ကြည့်ပေးတဲ့စနစ်လည်း ပါဝင်ပါတယ်။

ကုမ္ပဏီက သူတို့ရဲ့ ပြင်းထန်တဲ့အပူချိန်မှာ အလုပ်လုပ်နိုင်တဲ့နည်းပညာအတွက် US မူပိုင်ခွင့်ကိုလည်း ရယူထားပါသေးတယ်။ ဒီနည်းပညာက SSD ကို အပူချိန်ဇုန်သုံးခုခွဲကာ သူ့ရဲ့ transfer speed တွေကို အလိုအလျောက် ချိန်ညှိပေးနိုင်ပြီး သာမန် hardware တွေ မခံနိုင်တဲ့ အပူချိန်မြင့်မားတဲ့ ပတ်ဝန်းကျင်တွေမှာတောင် စွမ်းဆောင်ရည်ကောင်းမွန်စွာအလုပ်လုပ်စေမှာဖြစ်ပါတယ်။

TeamGroup ဘက်က P250Q-M80 အတွက် ဈေးနှုန်းနဲ့ ဝယ်ယူလို့ရနိုင်မဲ့ကာလကို မကြေညာသေးပေမဲ့ သူ့ရဲ့ အမြန်နှုန်းမြင့် စွမ်းဆောင်ရည်နဲ့ အဆင့်မြင့် ဒေတာဖျက်ဆီးရေး feature တွေ ပေါင်းစပ်ပါဝင်မှုကတော့ secure storage solutions တွေရဲ့ ဈေးကွက်မှာ အထင်ကရထုတ်ကုန်တစ်ခုအဖြစ် ရပ်တည်စေမှာဖြစ်ပါတယ်။

P250Q-M80 ဟာ မကြာသေးခင်က ကျင်းပခဲ့တဲ့ Computex 2025 မှာ cybersecurity ကဏ္ဍအတွက် Best Choice Award ဆုကိုလည်း ရရှိခဲ့ပါတယ်။

Source: TechSpot