ဗီဒီယိုများမှ ဝါးထားသည့် Pixel များကို ပြန်လည်ကြည်လင်စေခြင်းသည် သင်ထင်ထားသည်ထက် ပိုမိုလွယ်ကူနေ

Image via TechSpot

Pixelation နဲ့ blur filter တွေကို ထိလွယ်ရှလွယ် အကြောင်းအရာတွေ၊ မသင့်တော်တဲ့ အရာတွေကို ဆင်ဆာဖြတ်ဖို့ အသုံးပြုလေ့ရှိကြပါတယ်။။ ဒါပေမယ့် ဒီလိုဖုံးထားတာတွေကို ပြန်ဖော်တဲ့ နည်းလမ်းတွေ၊ ကိရိယာတွေကလည်း မကြာသေးခင်ကစပြီး အလွယ်တကူ ရလာနေပါပြီ။ ပြန်ဖော်ထားတဲ့ ပုံတွေက မူရင်းလောက်တော့ မကြည်လင်ဘူးပေမဲ့ ဆင်ဆာလုပ်ထားတဲ့ ဗီဒီယို အများစုထဲက ဖျောက်ထားတဲ့ အချက်အလက်တွေကို မြင်နိုင်တဲ့အထိတော့ ပြန်ဖော်နိုင်လာပါတယ်။

Developer တစ်ယောက်ဖြစ်တဲ့ Jeff Geerling က သူ့ရဲ့ YouTube ဗီဒီယိုတစ်ခုမှာ အခမဲ့ရနိုင်တဲ့ ဆော့ဖ်ဝဲလ်သုံးပြီး Mosaic ဆင်ဆာနောက်ကွယ်က အချက်အလက်တွေကို ဘယ်လိုပြန်ဖော်လို့ရလဲဆိုတာ သရုပ်ပြခဲ့ပါတယ်။ သူ့စမ်းသပ်မှုမှာ ပြသလိုတာကတော့ ဗီဒီယိုထဲမှာ တစ်ခုခုကို ဖုံးကွယ်တယ်ဆိုရင် လုံးဝမမြင်ရအောင် အပြည့်ဖုံးတာ (solid block)၊ ဒါမှမဟုတ် အစကတည်းက ရိုက်မထားတာက အကောင်းဆုံးပဲ ဆိုတာပါပဲ။

Comment ရေးသူတစ်ယောက်က သူ့ဗီဒီယိုမှာ Pixelation သုံးပြီး အချက်အလက် ဖုံးထားတာကို ထောက်ပြခဲ့တဲ့အခါ Geerling ဟာ pixelated ဖိုင်ထဲက အကြောင်းအရာတွေကို ပြန်ဖော်နိုင်တဲ့သူကို ဒေါ်လာ ၅၀ ပေးမယ်ဆိုပြီး စမ်းသပ် ဗီဒီယိုအပိုင်းလေးတစ်ခု တင်လိုက်ပါတယ်။ ၂၄ နာရီတောင် မပြည့်သေးခင်မှာ ကြည့်ရှုသူ တော်တော်များများက ဝါးပေမဲ့ အနီးစပ်ဆုံး ပြန်ဖော်ထားတဲ့ ပုံတွေကို တင်ပြလာကြပါတယ်။ ဒါက Mosaic filter တွေကိုချည်း အားကိုးလို့ မရဘူးဆိုတာကို သက်သေပြနေတာပါ။

Image via TechSpot

GitHub အသုံးပြုသူတစ်ဦးဖြစ်တဲ့ KoKuToru ဆိုသူကတော့ FFmpeg နဲ့ GIMP လို ကိရိယာတွေနဲ့ pixelated ပုံတွေကို ဘယ်လို အလိုအလျောက် ပြန်ဖော်နိုင်လဲဆိုတာ အသေးစိတ်ရှင်းပြထားပါတယ်။ အဓိကကတော့ လှုပ်ရှားမှု (motion) ပါပဲ။ ဆင်ဆာလုပ်ထားတဲ့ နေရာက ဗီဒီယို frame တွေမှာ နေရာရွေ့သွားတဲ့အခါ မူလပုံရဲ့ အစိတ်အပိုင်းလေးတွေက pixelation ကြားကနေ ခဏ ခဏ ပေါ်လာပါတယ်။ ဆော့ဖ်ဝဲလ်က frame တစ်ခုချင်းစီက ဒီလိုပေါ်လာတဲ့ အချက်အလက် အပိုင်းအစလေးတွေကို စုစည်းပြီး မူလပုံနဲ့ နီးစပ်အောင် ပြန်လည် တည်ဆောက်ပေးနိုင်တာပါ။

Pixelation ဟာ အပေါက်ငယ်များစွာပါတဲ့ ခြံစည်းရိုးတစ်ခုနဲ့ တူပါတယ်။ အဲ့ဒီနောက်က ဖုံးထားတဲ့အရာက လှုပ်ရှားနေတဲ့အခါ အပေါက်တွေကနေ မတူညီတဲ့ အစိတ်အပိုင်းလေးတွေ ခဏ ခဏ မြင်နေရသလိုပါပဲ။ အချိန်ကြာလာတာနဲ့အမျှ ဒီလိုမြင်ရတဲ့ အစအနတွေ စုပြီး မူလပုံကို ပြန်လည်တည်ဆောက်ဖို့ လုံလောက်တဲ့ အချက်အလက်တွေ ရနိုင်ပါတယ်။ ဒါကြောင့် လှုပ်ရှားမှုမရှိတဲ့ ဓာတ်ပုံလို ရုပ်ငြိမ်တွေမှာတော့ Mosaic ဆင်ဆာကို ပြန်ဖော်ဖို့ ပိုမိုခက်ခဲပါတယ် (လုံးဝ မဖြစ်နိုင်တာမျိုးလည်း ရှိနိုင်ပါတယ်)။

Image via TechSpot

Image via TechSpot

KoKuToru ရဲ့ ပထမဆုံး ကြိုးစားမှုမှာတော့ pixelated frame တွေကို တစ်ခုချင်း လိုက်ကြည့်ပြီး ပြန်ဆက်စပ်ခဲ့တာမို့ သိပ်မရှင်းလင်းတဲ့ ရလဒ်ပဲ ရခဲ့ပါတယ်။ ဒုတိယအကြိမ်မှာတော့ FFmpeg ကိုသုံးပြီး ဆင်ဆာလုပ်ထားတဲ့ frame ၂၀၀ ကို အလိုအလျောက် ထုတ်ယူ၊ ပြီးတော့ edge detection လို နည်းပညာတွေသုံးပြီး ပိုကြည်လင်တဲ့ ပုံရိပ်တစ်ခုကို ပြန်ဖော်နိုင်ခဲ့ပါတယ်။

သူ့ရဲ့ နည်းလမ်းဟာ ဗီဒီယိုဂိမ်းတွေမှာ သုံးတဲ့ temporal anti-aliasing နည်းပညာတွေနဲ့ အတော်လေးဆင်တူပါတယ်။ TAA၊ FSR၊ DLSS နဲ့ XeSS လို နည်းပညာတွေဟာ resolution နိမ့်တဲ့ frame တွေကို ပိုကောင်းအောင်လုပ်ဖို့ လှုပ်ရှားမှု အချက်အလက် (motion data) ကို အသုံးချထားတာ ဖြစ်ပါတယ်။

Geerling က blur filter တွေဟာ ပိုခံနိုင်ရည်ရှိမလားဆိုတာကိုလည်း တွေးတောခဲ့ပေမဲ့ commenter တွေကတော့ အဲဒီလို မထင်ကြပါဘူး။ နက္ခတ္တဗေဒပညာရှင်တွေဟာ ကမ္ဘာ့လေထုကြောင့် ဝါးသွားတာကို ပြုပြင်ဖို့ နည်းပညာတွေကို ဆယ်စုနှစ်ပေါင်းများစွာ တီထွင်သုံးစွဲလာခဲ့တာပါ။ သီအိုရီအရ ဒီနည်းပညာတွေကို ဗီဒီယိုထဲက blur filter တွေကို ပြန်ဖော်ဖို့လည်း သုံးနိုင်ပါတယ်။ Geerling မှတ်ချက်ပြုထားသလို အလုံခြုံဆုံးနည်းလမ်းကတော့ နောက်ကွယ်မှာ ဘာအချက်အလက်မှ မပါတဲ့ အရောင်ပိတ် (solid color) နဲ့ အပြည့်ဖုံးလိုက်တာအကောင်းဆုံးဖြစ်ပါတယ်။

Source: TechSpot