Desktop PC များနှင့် ပရင်တာများနေအိမ်တွင်ထားခဲ့ရန် ကိုးရီးယား Starbucks မှ စည်းကမ်းသစ်ထုတ်ပြန်

Image: Korea Herald

Starbucks ဆိုင်တွေမှာ ဖောက်သည်တွေက ကော်ဖီလေးတစ်ခွက်သောက်ရင်း သူတို့ရဲ့ laptop ဒါမှမဟုတ် tablet တွေနဲ့ အလုပ်လုပ်နေတာ၊ စာကျက်နေတာကို တွေ့ရလေ့ရှိပါတယ်။ ဒါပေမဲ့ တောင်ကိုရီးယားနိုင်ငံမှာတော့ ဒီအခြေအနေက အတိုင်းအတာလွန်လာတာကြောင့် ကုမ္ပဏီက ကော်ဖီဆိုင်တွေကို အိမ်ကရုံးခန်းလိုမျိုး မလုပ်ကြဖို့ ဖောက်သည်တွေကို တောင်းဆိုတဲ့ ဆိုင်းဘုတ်တွေကို တစ်နိုင်ငံလုံးမှာ စိုက်ထူလိုက်ရပါပြီ။

The Korea Herald က မကြာသေးခင်က ဖော်ပြခဲ့တဲ့ သတင်းတစ်ပုဒ်အရ Starbucks ဟာ သူတို့ရဲ့ တောင်ကိုရီးယားကော်ဖီဆိုင်တွေမှာ အရွယ်အစားအပြည့်ရှိတဲ့ desktop ကွန်ပျူတာတွေ၊ ပရင်တာတွေ၊ မီးကြိုးခွေတွေနဲ့ ကိုယ်ပိုင်နေရာအတွက် အကာအရံတွေ အသုံးပြုခြင်းကို တားမြစ်လိုက်ပြီ ဖြစ်ပါတယ်။ မိတ်ဆွေတို့ စဉ်းစားကြည့်ပါ သင်ကော်ဖီလေးတစ်ခွက် အမြန်ဝင်သောက်မယ်စိတ်ကူးနဲ့ ဝင်သွားချိန်မှာ တစ်ယောက်ယောက်က desktop ကွန်ပျူတာကြီးနဲ့ အစီရင်ခံစာတစ်စောင်ကို ရိုက်နေတာ၊ ဒါမှမဟုတ် ဂိမ်းဆော့နေတာကို တွေ့လိုက်ရမယ့် အဖြစ်မျိုးပါ။

သတင်းထဲမှာတော့ ဒီလိုဖောက်သည်မျိုးကို "cagongjok" လို့ တံဆိပ်တပ်ထားပါတယ်။ ဒါက ကိုရီးယားစကားလုံး "café" နဲ့ "gongbujok" ကို ပေါင်းစပ်ထားတဲ့ စကားလုံးသစ်ဖြစ်ပြီး ကော်ဖီဆိုင်တွေမှာ အချိန်အကြာကြီးထိုင်ပြီး အလုပ်လုပ်သူ ဒါမှမဟုတ် စာလုပ်တဲ့သူတွေကို ဖော်ပြဖို့အတွက် အသုံးများပါတယ်။

Image: Korea Herald

ဆိုင်းဘုတ်အသစ်တွေမှာ ဖောက်သည်တွေကို လူအများထိုင်တဲ့ စားပွဲတွေမှာ တခြားသူတွေအတွက် နေရာချန်ပေးဖို့နဲ့ အချိန်အကြာကြီးထွက်သွားမယ်ဆိုရင် ကိုယ့်ပစ္စည်းတွေကို ယူသွားဖို့လည်း တောင်းဆိုထားပါတယ်။ Starbucks Korea ရဲ့ ကိုယ်စားလှယ်တစ်ဦးက The Korea Herald ကို ပြောကြားရာမှာတော့ ဒီမူဝါဒအသစ်ဟာ ဆိုင်ကို ဧည့်သည်အားလုံးအတွက် သက်သောင့်သက်သာဖြစ်စေဖို့နဲ့ ပစ္စည်းပျောက်ဆုံးခြင်း ဒါမှမဟုတ် ခိုးယူခံရခြင်းကို လျှော့ချဖို့အတွက် ရည်ရွယ်တယ်လို့ ဆိုပါတယ်။

ကိုရီးယား ဆိုရှယ်မီဒီယာတွေမှာ ဝေမျှထားတဲ့ ရုံးခန်းအသေးစားလိုဖြစ်နေတဲ့ နေရာတွေရဲ့ ဓာတ်ပုံတွေကလည်း ကြားရတဲ့အတိုင်းပဲ တကယ်ကို အံ့ဩစရာကောင်းလှပါတယ်။

Korea Foodservice Industry Research Institute က ၂၀၁၉ ခုနှစ်က ပြုလုပ်ခဲ့တဲ့ ခန့်မှန်းချက်အရ ဒေါ်လာ ၃ ဒေါ်လာတန် ကော်ဖီတစ်ခွက်ဟာ "ထိုင်ခုံမှာထိုင်တဲ့အချိန်" တစ်နာရီနဲ့ ၄၂ မိနစ်စာကိုပဲ ကာမိတယ်လို့ ဆိုပါတယ်။ သူတို့ဟာ သူတို့ရဲ့ အီလက်ထရွန်းနစ်ပစ္စည်းတွေအတွက် လျှပ်စစ်မီးသုံးစွဲနေသလို၊ ဒီလိုထိုင်ခုံနေရာယူထားခြင်းဟာ ဆိုင်ကို ဝင်လာနိုင်တဲ့ အခြားဖောက်သည်တွေကိုတောင် ဝေးဝေးလှည့်သွားစေနိုင်ပါတယ်။

တောင်ကိုရီးယားနိုင်ငံမှာ ကော်ဖီဆိုင်အရေအတွက်ဟာ ၂၀၁၅ ခုနှစ်နဲ့ ၂၀၂၄ ခုနှစ်ကြားမှာ နှစ်ဆတိုးလာခဲ့ပြီး၊ အခုဆိုရင် နိုင်ငံရဲ့ အကြီးဆုံး convenience store လေးခုထက်တောင် အများကြီး ပိုများနေပါပြီ။

Starbucks က laptop တွေသုံးတာ ဒါမှမဟုတ် စာကြည့်တာကို တားမြစ်နေတာမဟုတ်ဘဲ သူတို့က ဖောက်သည်တွေကို သူတို့ရဲ့ အိမ်ရုံးခန်းကို ရှိသင့်တဲ့နေရာဖြစ်တဲ့ အိမ်မှာပဲ ထားခဲ့စေချင်တာဖြစ်တယ်ဆိုတာကိုတော့ ထပ်လောင်းပြောကြားထားပါတယ်။

Source: TechSpot