ခေတ်သစ်ဂိမ်းလောက၏ ဗိသုကာကြီး Vince Zampella ကို အမှတ်ရခြင်း

Image via Game Informer

၂၀၂၅ ခုနှစ်၊ ဒီဇင်ဘာလရဲ့ နှောင်းပိုင်းကာလမှာ ကျွန်တော်တို့အားလုံး ရင်ထုမနာဖြစ်ရမယ့် သတင်းဆိုးတစ်ခုကို ကြားလိုက်ရပါတယ်။ သူကတော့ ခေတ်သစ် First-Person Shooter (FPS) ဂိမ်းလောကကို ပုံဖော်ခဲ့တဲ့ ဗိသုကာကြီး၊ Infinity Ward နဲ့ Respawn Entertainment တို့ရဲ့ ဖခင်ကြီး Vince Zampella ဟာ အသက် ၅၅ နှစ်အရွယ်မှာ မတော်တဆမှုတစ်ခုကြောင့် ကွယ်လွန်သွားခဲ့ပါတယ်။ အသက် ၅၅ နှစ်ဆိုတဲ့ အရွယ်ဟာ ဖန်တီးမှုတွေ အရှိန်အဟုန်ကောင်းနေဆဲ အချိန်ဖြစ်သလို သူ့ဆီကနေ Battlefield ရဲ့ အနာဂတ်သစ်ကို စောင့်မျှော်နေကြတဲ့ ပရိသတ်တွေအတွက်တော့ ဒီသတင်းဟာ တကယ့်ကို မိုးကြိုးပစ်သလို ခံစားရစေပါတယ်။ ဒီလို ကွယ်လွန်သွားခဲ့တဲ့ သူ့အတွက် ဂိမ်းကစားသူတွေနဲ့ လုပ်ဖော်ကိုင်ဖက်တွေက "ဂိမ်းလောကရဲ့ ဧရာမ ကျောက်တိုင်ကြီးတစ်ခု ပြိုလဲသွားပြီ" လို့ တင်စားနေကြပါတယ်။ 

Vince ရဲ့ ဘဝအကြောင်းကို ပြန်ကြည့်ရင် သူဟာ အောင်မြင်မှုတွေကို ရွှေလင်ဗန်းနဲ့ အချင်းဆေးခံခဲ့ရတာမျိုး မဟုတ်ဘဲ သူ့ရဲ့ ဝါသနာနဲ့ မလျော့တဲ့ ဇွဲကြောင့်သာ ရရှိခဲ့တာကို တွေ့ရမှာပါ။ သူဟာ ငယ်စဉ်ကတည်းက ဂိမ်းကစားရတာကို အရူးအမူး ဝါသနာပါခဲ့သူဖြစ်ပြီး Arcade ဂိမ်းတွေဖြစ်တဲ့ Donkey Kong တို့ကို ကစားရင်း ဂိမ်းဖန်တီးသူတစ်ယောက်ဖြစ်ဖို့ အိပ်မက်မက်ခဲ့ပါတယ်။ သူဟာ ဂိမ်းလောကထဲကို စတင်ဝင်ရောက်လာချိန်မှာတော့ ဘာအဆက်အသွယ်မှ မရှိတဲ့ သာမန်လူငယ်တစ်ယောက်အဖြစ် Game Tester အလုပ်ကနေ စတင်ခဲ့တာပါ။ တကယ်တော့ Game Tester ဆိုတာ တော်တော်လေး စိတ်ရှည်ရသလို ပင်ပန်းတဲ့ အလုပ်မျိုးပါ။ ဒါပေမဲ့ အဲ့ဒီအလုပ်ကနေပဲ ဂိမ်းတစ်ခုမှာ ဘာတွေက လိုအပ်နေလဲ၊ ကစားသူတွေက ဘာကို နှစ်သက်တာလဲဆိုတာကို သူ အသေအချာ လေ့လာနိုင်ခဲ့ပါတယ်။ ၁၉၉၀ ခုနှစ်တွေရဲ့ အစောပိုင်းကာလမှာ သူ ဖြတ်သန်းခဲ့တဲ့ အတွေ့အကြုံတွေဟာ နောက်ပိုင်းမှာ ပေါ်ထွက်လာမယ့် Call of Duty တို့ Modern Warfare တို့လို ကမ္ဘာကျော် ဂိမ်းတွေအတွက် အုတ်မြစ်ဖြစ်လာခဲ့တာပါ။

သူ့ရဲ့ အောင်မြင်မှု ခရီးစဉ်မှာ 2015 Inc. ဆိုတဲ့ စတူဒီယိုမှာ လုပ်ခဲ့တဲ့ Medal of Honor: Allied Assault ဂိမ်းဟာ ပထမဆုံး အချိုးအကွေ့တစ်ခုလို့ ပြောရပါမယ်။ အဲ့ဒီအချိန်က ရုပ်ရှင်တွေမှာပဲ မြင်တွေ့ရတဲ့ စစ်မြေပြင်ရဲ့ ကြောက်မက်ဖွယ်ကောင်းမှုနဲ့ ရင်ခုန်စိတ်လှုပ်ရှားစရာတွေကို ဗီဒီယိုဂိမ်းထဲမှာ အသက်ဝင်အောင် သူ ဖန်တီးပြခဲ့ပါတယ်။ ဒါပေမဲ့ Vince ဟာ သူတစ်ပါးရဲ့ လက်အောက်မှာပဲ အမြဲတမ်း နေချင်တဲ့သူ မဟုတ်ပါဘူး။ သူဟာ သူ့ရဲ့ ကိုယ်ပိုင် စိတ်ကူးစိတ်သန်းတွေကို လွတ်လွတ်လပ်လပ် အကောင်အထည်ဖော်ချင်ခဲ့ပါတယ်။ ဒါကြောင့်လည်း ၂၀၀၂ ခုနှစ်မှာ Jason West နဲ့အတူ Infinity Ward ကို တည်ထောင်ခဲ့တာပါ။ သူတို့ဟာ Activision နဲ့ ပူးပေါင်းပြီး Call of Duty ဆိုတဲ့ အမည်နာမတစ်ခုကို ကမ္ဘာအရပ်ရပ်က ဂိမ်းကစားသူတွေရဲ့ နှလုံးသားထဲ ရောက်အောင် ပို့ဆောင်နိုင်ခဲ့ပါတယ်။ လူတစ်ယောက်တည်းက သူရဲကောင်းလုပ်တဲ့ ပုံစံမျိုးထက် စစ်မြေပြင်မှာ အတူတူတိုက်ပွဲဝင်နေရတဲ့ စစ်သားတစ်ယောက်ရဲ့ ခံစားချက်ကို ပေးနိုင်ခဲ့လို့ပဲ ဖြစ်ပါတယ်။

Vince ရဲ့ ပါရမီဟာ Modern Warfare ထွက်ရှိလာတဲ့အချိန်မှာတော့ အထွတ်အထိပ်ကို ရောက်သွားခဲ့ပါတယ်။ အထူးသဖြင့် ၂၀၀၇ ခုနှစ်မှာ ထွက်ရှိခဲ့တဲ့ Call of Duty 4: Modern Warfare ဟာ FPS ဂိမ်းတွေရဲ့ သမိုင်းကို တစ်ဆစ်ချိုး ပြောင်းလဲပစ်ခဲ့ပါတယ်။ သူဟာ ဒုတိယကမ္ဘာစစ်ကိုပဲ အာရုံစိုက်နေချိန်မှာ Zampella က FPS ဂိမ်းတွေကို ခေတ်သစ် စစ်ပွဲတွေဆီ ရဲရဲဝံ့ဝံ့ မိတ်ဆက်ခဲ့ပါတယ်။ ဒီဂိမ်းကြောင့်ပဲ Multiplayer စနစ်မှာ Level တက်တာ၊ ကိုယ်ပိုင် သေနတ်တွေကို စိတ်ကြိုက်ပြင်ဆင်တာ စတဲ့ အခြေခံအချက်အလက်တွေဟာ Vince ရဲ့ စိတ်ကူးကနေ ပေါက်ဖွားလာခဲ့တာ ဖြစ်ပြီး ဒီနေ့ခေတ်မှာတော့ ဒါတွေဟာ ဂိမ်းတိုင်းမှာ မပါမဖြစ် စံနှုန်းတွေ ဖြစ်နေပါပြီ။ ဒါပေမဲ့ ဒီအောင်မြင်မှုတွေကြားမှာပဲ ကုမ္ပဏီကြီးတွေရဲ့ အာဏာပြမှုနဲ့ လုပ်ငန်းခွင်အတွင်းက ပဋိပက္ခတွေကြောင့် သူဟာ သူကိုယ်တိုင် ဖန်တီးခဲ့တဲ့ အိမ်ဂေဟာကနေ နှင်ထုတ်ခံခဲ့ရပါတယ်။ အဲ့ဒီအချိန်တုန်းက ဂိမ်းလောကသားတွေကြားမှာ တော်တော်လေးကို ဂယက်ထသွားခဲ့ပြီး Vince ရဲ့ အနာဂတ်ကိုလည်း အားလုံးက စိုးရိမ်ခဲ့ကြပါတယ်။

ဒါပေမဲ့ Vince ဆိုတာ အရှုံးမပေးတတ်တဲ့သူပါ။ သူဟာ Respawn Entertainment ကို အသစ်ပြန်လည် တည်ထောင်ပြီး သူနဲ့အတူ ပါလာတဲ့ ဝန်ထမ်းတွေကို မိသားစုလို စောင့်ရှောက်ခဲ့ပါတယ်။ Titanfall လို ဂိမ်းမျိုးကို ထုတ်လုပ်ပြီး သူဟာ အရင်ကထက် ပိုမိုကောင်းမွန်တဲ့ ဖန်တီးမှုတွေကို လုပ်နိုင်စွမ်းရှိသေးကြောင်း သက်သေပြခဲ့ပါတယ်။ ဧရာမ စက်ရုပ်ကြီးတွေ (Titans) နဲ့ လူသားစစ်သားတွေ (Pilots) ကြားက ဟန်ချက်ညီတဲ့ ကစားကွက်တွေက Zampella ရဲ့ ထက်မြက်မှုကို ထပ်မံသက်သေပြခဲ့ပါတယ်။ Titanfall 2 ဂိမ်းဆိုရင် FPS ဂိမ်းတွေ နှစ်သက်သူတွေအဖို့ ကစားလို့အကောင်းဆုံး FPS ဂိမ်းတစ်ခုအဖြစ် သတ်မှတ်ခံထားရပါတယ်။ ဒါပေမဲ့ သူရဲ့ အကြီးမားဆုံး အောင်မြင်မှုတစ်ခုကတော့ ၂၀၁၉ ခုနှစ်တွင် ထွက်ရှိခဲ့တဲ့ Apex Legends ဂိမ်းဖြစ်ပါတယ်။ 

Apex Legends ဆိုတာလည်း ဘယ်သူမှ မထင်ထားတဲ့ အချိန်မှာ ရုတ်တရက် ထွက်ပေါ်လာပြီး တစ်ကမ္ဘာလုံးကို လွှမ်းမိုးသွားခဲ့တာပါ။ Apex Legends ကို ဘာကြော်ငြာမှ မလုပ်ဘဲ ရုတ်တရက် ထုတ်ဝေခဲ့တာဟာ ဂိမ်းလောကမှာ စွန့်စားမှုအကြီးဆုံး လုပ်ရပ်တစ်ခု လို့ဆိုနိုင်ပါတယ်။ ဒီစွန့်စားမှုဟာ မှန်ကန်ခဲ့ပြီး ၇၂ နာရီအတွင်း ကစားသူ ၁၀ သန်းကျော် ရရှိခဲ့ပါတယ်။ Vince ဟာ စီးပွားရေးသမားတစ်ယောက်လိုတွေးတောလေ့မရှိပဲ ဂိမ်းကစားသူ တစ်ယောက်လိုပဲ အမြဲတွေးတောတတ်တာကြောင့် သူ့ရဲ့ ဂိမ်းတွေဟာ ကစားသူတွေနဲ့ အမြဲတမ်း နီးစပ်နေခဲ့တာ ဖြစ်ပါတယ်။ သူဟာ အမြဲတမ်း အသစ်အသစ်တွေကို စမ်းသပ်ချင်နေသူဖြစ်ပြီး Star Wars လို ကြီးမားတဲ့ နာမည်တစ်ခုကိုလည်း အကောင်းဆုံး ပုံဖော်ပေးနိုင်ခဲ့ပါတယ်။

သူ့ရဲ့ ခေါင်းဆောင်မှုဟာ တခြားသူတွေနဲ့ မတူပါဘူး။ သူဟာ ဝန်ထမ်းတွေကို ဖိအားပေးပြီး အလုပ်လုပ်ခိုင်းတာထက် သူတို့ရဲ့ ဖန်တီးနိုင်စွမ်းကို ယုံကြည်ပေးပြီး လွတ်လပ်ခွင့်ပေးတဲ့သူပါ။ ဒါကြောင့်လည်း သူ့ဆီမှာ လုပ်တဲ့သူတွေဟာ အကောင်းဆုံး ဂိမ်းတွေကို ထုတ်လုပ်နိုင်ခဲ့ကြတာ ဖြစ်ပါတယ်။  ဒါကြောင့်လည်း EA ဟာ ၂၀၂၁ မှာ ပရိတ်သတ်တွေ လက်ခံအားပေးမှုကျဆင်းလာတဲ့ Battlefield စီးရီးကို ပြန်လည်ကြီးကြပ်ဖို့ Franchise Head ခန့်အပ်ခဲ့ပြီး သူ့လက်အောက်မှာ Battlefield 6 ဟာ ထွက်ရှိပြီး ၃ ရက်အတွင်း ဂိမ်းခွေရေ ၇ သန်းကျော် ရောင်းချနိုင်ခဲ့ကာ Battlefield စီးရီးတစ်ခုလုံးမှာ အအောင်မြင်ဆုံးဂိမ်း ဖြစ်လာခဲ့ပါတယ်။

 ၂၀၂၅ ခုနှစ်မှာ သူ ကွယ်လွန်သွားတဲ့အခါ ကျွန်တော်တို့အတွက် ကျန်ရစ်ခဲ့တာကတော့ သူ ဖန်တီးခဲ့တဲ့ ခမ်းနားလှတဲ့ ဒစ်ဂျစ်တယ် ကမ္ဘာကြီးတွေပဲ ဖြစ်ပါတယ်။ သူဟာ ဂိမ်းလောကထဲကို ဝင်လာခဲ့တဲ့ သာမန်ကောင်လေးတစ်ယောက်ကနေ သမိုင်းတွင်မယ့် ခေါင်းဆောင်ကြီးတစ်ယောက်အဖြစ် သူ့ဘဝကို အဆုံးသတ်သွားခဲ့တာပါ။ သူရဲ့ ကွယ်လွန်မှု သတင်းကြောင့် Microsoft၊ Sony၊ Nintendo နှင့် Ubisoft တို့လို ပြိုင်ဘက်ကုမ္ပဏီကြီးတွေက ဝမ်းနည်းကြောင်း သဝဏ်လွှာတွေ ပေးပို့ခဲ့ကြပါတယ်။ သူ့ကို ချစ်ခင်သူတွေက Los Angeles မှာရှိတဲ့ သူရဲ့ ရုံးခန်းအပြင်ဘက်မှာ ဂိမ်းစက်ခလုတ်တွေ၊ ပန်းစည်းတွေနဲ့ Apex Legends အရုပ်လေးတွေကို ထားရှိပြီး ဂုဏ်ပြုခဲ့ကြပါတယ်။

အခုတော့ Vince မရှိတော့ပေမယ့် ကျွန်တော်တို့ ဂိမ်းကစားတဲ့အခါတိုင်း၊ တိုက်ပွဲတွေထဲမှာ အဖွဲ့လိုက် လှုပ်ရှားတဲ့အခါတိုင်း သူ့ရဲ့ စိတ်ကူးစိတ်သန်းတွေကို သတိရနေမိမှာပါ။ သူဟာ ကျွန်တော်တို့ရဲ့ အားလပ်ချိန်တွေကို ပျော်ရွှင်မှုတွေနဲ့ ဖြည့်ဆည်းပေးခဲ့သလို၊ သူငယ်ချင်းတွေကြားမှာလည်း ဂိမ်းတွေကတစ်ဆင့် ရင်းနှီးမှုတွေကို တည်ဆောက်ပေးခဲ့ပါတယ်။ Vince Zampella ဆိုတဲ့ နာမည်ဟာ ဂိမ်းလောကရဲ့ သမိုင်းစာမျက်နှာတွေမှာ ရွှေရောင်စာလုံးတွေနဲ့ ထာဝရ တည်ရှိနေမှာ ဖြစ်သလို၊ နောက်ထပ် ပေါ်ထွက်လာမယ့် ဂိမ်းဖန်တီးသူတွေအတွက်လည်း စံပြပုဂ္ဂိုလ်ကြီးအဖြစ် ရှိနေဦးမှာပါ။ သူ ထားရစ်ခဲ့တဲ့ အမွေအနှစ်တွေဟာ လူသားတွေ ရှိသရွေ့၊ ဂိမ်းတွေ ရှိသရွေ့ ဘယ်တော့မှ ပျောက်ကွယ်သွားမှာ မဟုတ်ပါဘူး။ အရာအားလုံးအတွက် ကျေးဇူးတင်ပါတယ် Vince ရေ ခင်ဗျားဖန်တီးပေးခဲ့တဲ့ ဒစ်ဂျစ်တယ်ကမ္ဘာတွေနဲ့ ပျော်ရွှင်မှုတွေအတွက် ကျွန်တော်တို့ အမြဲ အောက်မေ့သတိရနေမှာပါ။

Note: En Thue Tech ၏ သတင်းဆောင်းပါးများကို ခွင့်ပြုချက်မရှိဘဲ တစ်စိတ်တစ်ပိုင်းဖြစ်စေ၊ အပြည့်အစုံဖြစ်စေ ပြန်လည်ကူးယူဖော်ပြခွင့်မပြုပါ။

Source: EA, Respawn Entertainment, IGN, GamesIndustry.biz, Variety and AP